ABŞ-la Çin arasında ticarət sazişi istiqamətində əldə edilən irəliləyişlər təhlükəsiz aktivlərə tələbi azaltdığı üçün qızılın qiymətində avqust ayının ortalarından bəri ilk həftəlik ucuzlaşma qeydə alınıb.

Marja xəbər verir ki, Bakı vaxtı ilə saat 09:30-a olan məlumata görə, qızılın unsiya üzrə qiyməti 1,3 faizədək düşərək təxminən 4058 dollar səviyyəsinə enib.

ABŞ Prezidenti Donald Trampın Asiya səfəri çərçivəsində apardığı diplomatik təmaslar iki ölkənin əhatəli razılaşmaya yaxınlaşdığını göstərib. Belə bir razılaşma, qızıla olan tələbi artıran iqtisadi risklər və geosiyasi gərginlikləri azalda bilər.

Keçən həftə qızılın qiyməti rekord səviyyəyə – 4 380 dollar/unsiya səviyyəsinə çatmışdı. 

Bununla belə, qızıl bu il ərzində təxminən 55 faiz bahalaşma göstərib.

Analitiklər bildirir ki, artıq daha əsaslı və məntiqli bir bazar şəraitinə qayıdırıq. ABŞ-Çin ticarət danışıqlarındakı bu irəliləyiş, gözləniləndən daha müsbət reaksiya doğurub.

Bu həftə bir sıra mərkəzi banklardan mühüm açıqlamalar gözlənilir – FED, Avropa Mərkəzi Bankı (AMB) və Yaponiya Bankı qərarlarını elan edəcək. FED-in 25 baza bəndi həcmində faiz endirimi etməsi, AMB və Yaponiya Bankının isə faizlərini sabit saxlaması proqnozlaşdırılır. Daha aşağı borclanma xərcləri, faiz gəliri gətirməyən qızıla adətən müsbət təsir göstərir.

XXX

Qızıl qiymətlərinin azalması, ABŞ və Çin nümayəndələrinin Malayziyada keçirilən ASEAN toplantıları çərçivəsində ilkin ticarət razılaşması üzərində razılığa gəlməsindən sonra sürətlənib. Bu razılaşmanın, ABŞ Prezidenti Donald Tramp və Çin Prezidenti Si Cinpinin bu həftə Cənubi Koreyada keçiriləcək görüşündə yekunlaşdırılması gözlənilir. Görüşdə ticarət "atəşkəsinin" uzadılması və daha genişmiqyaslı sazişin əsaslarının qoyulması planlaşdırılır.

“100%-lik gömrük rüsumu təhlükəsi aradan qalxıb, eləcə də Çin tərəfindən qlobal ixrac nəzarəti rejimi tətbiq olunması riski də azalıb,” – deyə ABŞ Xəzinədarlıq rəsmisi Skott Bessent bildirib. Onun sözlərinə görə, bu, yeni ticarət eskalasiyası riskinin azaldığını göstərir.

Bu proseslər riskli aktivlərə marağı artıraraq qızılın “təhlükəsiz liman” statusuna tələbi zəiflədib.

Bunula belə, qızılın qiymət itkisi FED-in oktyabrın 29-da keçiriləcək iclasında faiz dərəcələrini endirəcəyi gözləntiləri ilə məhdudlaşıb.

Keçən həftə açıqlanan ABŞ istehlak qiymətləri indeksi (CPI) gözləntilərdən zəif olub və bu da 25 baza bəndi həcmində faiz azaldılması ehtimallarını gücləndirib. İnvestorlar indi ilin sonuna qədər əlavə yumşalma siyasəti barədə siqnalları izləyirlər.

Faiz dərəcələrinin azalması, gəlir gətirməyən aktivlərin (məsələn, qızılın) saxlanılması xərclərini azaldır və ABŞ dollarına təzyiq göstərərək digər valyutalarla müqayisədə qızılı nisbətən ucuzlaşdırır.