ABŞ-ın texnologiya şirkəti - yarımkeçirici çip istehsalçısı Intel şirkəti iyul-sentyabr dövrünə dair maliyyə hesabatını açıqlayıb.

Şirkətin məlumatına görə, 2025-ci ilin üçüncü rübündə gəlir ötən ilin eyni dövrü ilə müqayisədə 3% artaraq 13,7 milyard ABŞ dollarına yüksəlib. Ötən ilin eyni dövründə Intel-in gəliri 13,3 milyard dollar təşkil etmişdi. Bu nəticə bazar gözləntilərini üstələyib.

Keçən ilin üçüncü rübündə təxminən 16,6 milyard dollar xalis zərər açıqlayan Intel bu ilin eyni dövründə 4,1 milyard dollar xalis mənfəət əldə edib.

Şirkətin hər səhminə düşən mənfəəti 90 sent olub. Müqayisə üçün, ötən ilin eyni dövründə hər səhmə görə 3,88 dollar zərər qeydə alınmışdı.

Balansın gücləndirilməsi üçün addımlar atılıb

Intel-in baş icraçı direktoru (CEO) Lip-Bu Tan bildirib ki, üçüncü rübün maliyyə nəticələri şirkətin strateji prioritetləri istiqamətində yaxşılaşan fəaliyyətini və sabit irəliləyişini əks etdirir.

Şirkətin maliyyə direktoru (CFO) David Zinsner isə qeyd edib ki, üçüncü rübdə balansı gücləndirmək üçün mühüm addımlar atılıb.

O, ABŞ hökumətindən sürətləndirilmiş maliyyə dəstəyi, həmçinin Nvidia və SoftBank Group tərəfindən edilən investisiyaları xüsusi vurğulayıb. Bu yatırımlar Intel-in əməliyyat çevikliyini artırıb.

Zinsner deyib:

“Gözləntilərdən daha güclü olan üçüncü rüb nəticələrimiz, ardıcıl dördüncü rübdə davam edən yaxşılaşmanı göstərir və əsas bazarlarımızın dayanıqlığını əks etdirir. Hazırda tələb təklifi üstələyir və bu tendensiyanın 2026-cı ilə qədər davam edəcəyini gözləyirik.”

Intel-ə milyardlarla dollar investisiya daxil olub

Avqust ayında Intel ABŞ hökuməti ilə 8,9 milyard dollarlıq investisiya müqaviləsi imzalayıb. Eyni ayda Yaponiyanın SoftBank Group-u şirkətə 2 milyard dollarlıq sərmayə qoymağı nəzərdə tutan razılaşma imzalayıb. Bundan əlavə, ötən ay Nvidia, xüsusi məlumat mərkəzləri və fərdi kompüter məhsullarının birgə inkişafı üçün Intel ilə əməkdaşlığa başladığını elan edib.