"Azərbaycan Banklar Assosiasiyası" (ABA) İctimai Birliyinin nəzdində Şəriət Şurasının yaradılması son mərhələdədir.

Bunu ABA-nın icraçı direktoru Yunus Abdulov Bakıda keçirilən "İslam Maliyyə Forumu 2025" tədbirində bildirib.

Onun sözlərinə görə, Şuranın Əsasnaməsinin hazırlanması və namizədlərin qiymətləndirilməsi artıq yekunlaşmaq üzrədir: "Yaxın vaxtlarda təsdiqlə bağlı addımlar atılacaq. Şura yalnız uyğunluğa nəzarət mexanizmi deyil, həm də sektorun etibar sütunu kimi çıxış edəcək. O, məhsulların dizaynından əməliyyatların auditinə qədər vahid istinad nöqtəsi rolunu oynayacaq".

Assosiasiya rəsmisi əlavə edib ki, atılan bütün addımlar tətbiq üçün tam uyğunluq yaradır: "Bazardakı maraq, mövcud bilik və tərəfdaşlıq şəbəkəsi, institusional dayaqlar AMB-nin strateji baxışı ilə eyni xətt üzərindədir".

 "Azərbaycan bankları İslam bankçılığı üçün hazırdır"

"Azərbaycan bankları İslam bankçılığı üçün hazırdır, bunun üçün institusional çərçivə tamamlanmalıdır", - Yunus Abdulov Bakıda keçirilən "İslam Maliyyə Forumu 2025" tədbirində bildirib.

Onun sözlərinə görə, bu ilin I yarısında keçirilmiş sorğu bankların İslam maliyyəsinə marağının yalnız nəzəri deyil, həm də praktiki xarakter daşıdığını göstərib: "Artıq həmin dövrdə bəzi banklar şəriətə uyğun maliyyələşmə həlləri üzərində işləyirdi və maraq konkret məhsul ailələrinə fokuslanmışdı. Əsas mesaj odur ki, bankların marağı sabitdir, müştəri seqmentləri aydındır və ilk tətbiq dalğası üçün lazımi bilik bazası mövcuddur. Başqa sözlə, bazar hazırdır – indi ona uyğun institusional çərçivəni tamamlamaq lazımdır".

Y. Abdulov qeyd edib ki, bu mərhələdə ən mühüm transformasiya institusionallaşma istiqamətində baş verir: "Burada xüsusi olaraq Azərbaycan Mərkəzi Bankının "2024-2026-cı illərdə maliyyə sektorunun inkişaf Strategiyası"nı xatırlatmaq istəyirəm. Strategiya maliyyə alətlərinin dərinləşdirilməsini və şaxələndirilməsini hədəf kimi müəyyən edir. Bu çərçivədə alternativ maliyyələşmə istiqamətlərinin – o cümlədən İslam bankçılığı və rəqəmsal kreditləşmənin – araşdırılması və hüquqi-normativ bazanın uyğunlaşdırılması nəzərdə tutulur. Artıq bankların İslam maliyyəsi məhsullarını "sandbox" rejimində sınaqdan keçirməsinə imkan yaradılıb".

AMB İslam bankçılığı üzrə potensialı artırmaq üçün təcrübə proqramlarına start verib

Azərbaycan Mərkəzi Bankı (AMB) İslam bankçılığı üzrə potensialın artırılması üçün Pakistan və Malaziya Mərkəzi Bankları, eləcə də Türkiyə İştirakçı Banklar Birliyi ilə təcrübə proqramlarına start verib.

Bunu AMB-nin Maliyyə sektorunun dayanıqlı inkişafı departamentinin direktoru Rüstəm Tahirov Bakıda keçirilən "İslam Maliyyə Forumu 2025" tədbirində bildirib.

O həmçinin qeyd edib ki, İslam maliyyəsi alətlərinin tətbiqindən sonra onun ilkin nəticələri təhlil ediləcək: "Bunun əsasında bu məhsulların çeşidinin və əhatə dairəsinin genişləndirilməsi imkanları qiymətləndiriləcək".

Hər gün yeni vakansiyalar - AzVak.az-da

© "Report"