Bakı Fond Birjası rəsmi olaraq Dünya Birjalar Federasiyasının (WFE) tamhüquqlu üzvü statusunu qazanıb.

Bu barədə açıqlama 21–23 oktyabr 2025-ci il tarixlərində İstanbul şəhərində keçirilən WFE-nin 64-cü Baş Assambleyası və İllik Yığıncağı çərçivəsində verilib. Tədbirdə Bakı Fond Birjası dünya üzrə aparıcı birjalar, klirinq mərkəzləri və tənzimləyici qurumlarla birlikdə iştirak edib.

WFE-yə tamhüquqlu üzv olmaq Bakı Fond Birjası üçün şəffaflıq və qlobal inteqrasiya istiqamətində atdığı mühüm bir addımdır.

WFE-nin assosiasiya (affiliate) üzvü olan Bakı Fond Birjası bir müddət öncə tamhüquqlu üzvlük prosesinə start vermişdi. WFE-nin tələblərinə cavab vermək üçün BFB ticarət infrastrukturu, bazar nəzarəti və idarəetmə mexanizmlərinin ən yaxşı beynəlxalq təcrübələrə uyğunlaşdırılması istiqamətində genişmiqyaslı daxili qiymətləndirmə işlərini aparıb.

Daha sonra WFE tərəfindən çoxmərhələli qiymətləndirmə prosesi həyata keçirilib və bu proses zamanı BFB-nin sistemləri və əməliyyat fəaliyyəti dəyərləndirilib. Bu müddət ərzində BFB WFE-nin İnkişaf və Texniki Baxış (Development & Technical Review) komitəsi ilə aktiv şəkildə əməkdaşlıq edib, bazar transformasiyası strategiyasını, məlumat infrastruktur layihələrini və KASE Data Hub tərəfdaşlığı, eləcə də Data Warehouse layihəsi kimi regional təşəbbüslərini təqdim edib.

Bu geniş fəaliyyət və şəffaf əməkdaşlıq nəticəsində WFE üzvlərinin Baş Assambleyası Bakı Fond Birjasının tamhüquqlu üzvlüyünü təsdiqləyib.

Tədbir zamanı Bakı Fond Birjasının İdarə heyətinin sədri Ruslan Xəlilov çıxış edərək bildirib:

“Dünya Birjalar Federasiyasına tamhüquqlu üzv olmaq təkcə nailiyyətimizin tanınması deyil, həm də yeni innovasiyalar və əməkdaşlıqlara açıq olmaq deməkdir. Azərbaycanı qlobal birja icmasında təmsil etməkdən və bazarımızın standartlarını daha da yüksəltməkdən qürur duyuruq.”

WFE-yə tamhüquqlu üzvlük Bakı Fond Birjasına bir sıra strateji üstünlüklər qazandırır:

Bazar fəaliyyəti və idarəetmədə beynəlxalq standart və ən yaxşı təcrübələrə çıxış

Davamlı maliyyə, rəqəmsallaşma və bazar dayanıqlığı üzrə qlobal dialoqlarda iştirak

Qlobal investorlar və maliyyə institutları arasında artan tanınma və etibarlılıq

Aparıcı birjalarla bilik və təcrübə mübadiləsi imkanları

Qlobal tendensiyalara uyğun yeni maliyyə alətləri və məhsulların tətbiqi potensialı

İnvestor inamının güclənməsi və beynəlxalq bazar şəbəkələrinə inteqrasiya.

Dünya Birjalar Federasiyası (WFE) birjalar və klirinq mərkəzlərini təmsil edən qlobal assosiasiyasıdır. Federasiya 250-dən çox bazar infrastrukturu təminatçısını, yəni dünyanın aparıcı fond, fyuçers və əmtəə birjalarını birləşdirir və ədalətli, şəffaf və səmərəli bazarların təşviqinə yönəlmiş fəaliyyət göstərir.