Qızıl, investorların mənfəət realizasiyasına getməsi fonunda çərşənbə axşamı bir qədər ucuzlaşıb.

Marja xəbər verir ki, ABŞ Federal Ehtiyat Sisteminin (Fed) faiz endirimlərini davam etdirəcəyi gözləntiləri və güclü “təhlükəsiz liman” tələbi ilə tarixi maksimuma çatan qızılın qiyməti, bu dəfə mənfəət satışları nəticəsində cüzi düşüb.

Bakı vaxtı ilə saat 08:20-yə olan məlumata görə, qızlın qiyməti 0,3% azalaraq unsiyası 4340,29 dollar səviyyəsində qərarlaşıb. Bazar ertəsi qızlın unsiyasının qiyməti 4381,21 dollara qalxaraq tarixi ən yüksək səviyyəsinə çatmışdı.

"KCM Trade" şirkətinin baş bazar analitiki Tim Waterer bildirib ki, “mənfəət satışları və təhlükəsiz liman alışlarının bir qədər zəifləməsi bu gün qızıl qiymətlərindəki geriləməyə səbəb olub. FED faiz endirimlərini davam etdirdikcə, qızıldakı hər bir geri çəkilmə alış fürsəti kimi qiymətləndiriləcək”.

Bazarlar artıq bu ay FED-dən 0,25 faiz bəndi və dekabrdada əlavə bir azalma gözləntisini tam şəkildə qiymətlərə daxil edib.

Waterer əlavə edib ki, “əgər bu həftənin sonuna doğru açıqlanacaq ABŞ istehlak qiymətləri indeksində (inflyasiya göstəricisi) mənfi sürpriz baş verməsə, qızıl bazarındakı mövcud artım trendinin hələ də yuxarı istiqamətli hərəkət üçün potensialı var”.

Hökumətin fəaliyyətinin dayandırılması səbəbindən gecikmiş statistik göstəricilərin cümə günü açıqlanacağı gözlənilir.

ABŞ hökumətinin bağlanması, senatorların ötən həftə onuncu dəfə razılığa gələ bilməməsi nəticəsində 20-ci gününə daxil olub. Ağ Evin iqtisadi müşaviri Kevin Hassett, bağlanmanın bu həftə ərzində başa çatmasının mümkün olduğunu bildirib.

Mənfəət satışı (mənfəət realizasiyası) – bir investisiya alətinin (məsələn, qızılın, səhmin) dəyər artımından əldə olunan gəliri nağd vəsaitə çevirmək məqsədilə həyata keçirilən satış əməliyyatıdır. Bu prosesdə investorlar, əvvəlcədən müəyyən etdikləri qiymət səviyyəsinə çatdıqda və ya bazar şəraitinə əsasən qazancı reallaşdırmaq üçün əllərindəki aktivləri satırlar. Bu, həm potensial gəliri qorumaq, həm də mümkün qiymət enişlərindən sığortalanmaq məqsədi daşıyır.

Hər gün yeni vakansiyalar - AzVak.az-da