Çip istehsalçısı Advanced Micro Devices (AMD) şirkətinin səhmlərinin qiyməti, Chatgpt-nin yaradıcısı OpenAI ilə strateji əməkdaşlığa başladığını elan etdikdən sonra 38 faizdən çox artım göstərib.

Marja xəbər verir ki, AMD, OpenAI-nin süni intellekt infrastrukturunu gücləndirmək məqsədilə xüsusi prosessor çipləri təmin edəcəyini, ilkin quraşdırmaların 2026-cı ilin ikinci yarısında başlayacağını açıqlayıb.

Şirkətlərin birgə bəyanatında bildirilir ki, tərəflər uzunmüddətli strateji tərəfdaşlıq çərçivəsində əməkdaşlıq edəcək. Razılaşmaya əsasən, OpenAI 6 gigavatt gücündə AMD çiplərindən istifadə edəcək.

Məlumata görə, OpenAI bundan sonra AMD-nin əsas strateji hesablama gücü tərəfdaşı olacaq. İlk mərhələdə 1 gigavattlıq AMD Instinct MI450 seriyalı çiplərin quraşdırılmasına başlanacaq.

Açıqlamada qeyd olunub ki, bu əməkdaşlıq hər iki şirkət üçün "qazan-qazan" vəziyyəti yaradacaq, böyük miqyaslı süni intellekt tətbiqlərinə yol açacaq və ümumilikdə ekosistemin inkişafını sürətləndirəcək.

Tərəfdaşlığın bir hissəsi olaraq, AMD OpenAI-yə 160 milyonadək AMD səhmini almaq hüququ verib. Bu hüquq müəyyən mərhələlərin tamamlanmasına əsasən mərhələli şəkildə aktivləşdiriləcək.

Cümə günü 164,67 dollar səviyyəsində bağlanan AMD səhmləri, bu xəbərin ardından bazaröncəsi ticarətdə 38 faiz artımla 225,35 dollara yüksəlib. Əksinə, rəqib Nvidianın səhmləri 1,7 faiz geriləyib.

AMD-nin baş direktoru Lisa Su, yeni əməkdaşlığı şərh edərək “OpenAI ilə tərəfdaşlıqdan məmnunuq və bu addım süni intellekt texnologiyalarının gələcəyini formalaşdıracaq,” – deyib.

OpenAI-nin baş direktoru Sam Altman isə razılaşmanı “süni intellektin tam potensialını reallaşdırmaq üçün tələb olunan hesablama gücünün yaradılmasında mühüm addım” kimi qiymətləndirib. Onun sözlərinə görə, AMD-nin yüksək performanslı çip sahəsindəki liderliyi, OpenAI texnologiyalarının daha çox insana, daha sürətli şəkildə çatdırılmasına imkan verəcək.