Səhmləri 9,5% bahalaşıb

Hitachi şirkətinin səhmləri cümə günü 9,5%-ə qədər bahalaşaraq 4 285 yen səviyyəsinə yüksəlib və Nikkei 225 indeksində ən yaxşı nəticəni göstərib. Nikkei indeksi ümumilikdə 1,5% artıb.

Marja xəbər verir ki, Yaponiyanın sənaye nəhəngi Hitachi, süni intellekt və enerji texnologiyaları sahəsində əməkdaşlıq üçün OpenAI ilə tərəfdaşlıq sazişi bağladığını açıqlayıb. Şirkət bu barədə sosial media platforması X (keçmiş Twitter) üzərindən məlumat yayıb.

Hitachi-nin baş direktoru Toşiaki Tokunaga bu həftə Tokioda OpenAI rəhbəri Sem Altman ilə görüşüb və tərəflər anlaşma memorandumu imzalayıblar.

Əməkdaşlığın detalları

Bloomberg-in məlumatına görə, əməkdaşlıq Hitachi-nin enerji və elektrik şəbəkələri əməliyyatlarını, həmçinin şirkətin soyutma, saxlama və rəqəmsal həllər mərkəzi Lumada platformasını da əhatə edəcək.

Bu tərəfdaşlıq Hitachi Energy bölməsinə dəstək göstərəcək. Bu bölmə data mərkəzlərinin fəaliyyəti üçün vacib olan elektrik ötürmə və enerji avadanlıqları istehsal edir və bərpa olunan enerji sahəsində xidmətlər təqdim edir.

Yapon texnologiya sektorunda geniş yüksəliş

OpenAI ilə əməkdaşlıq xəbəri Yaponiyada daha geniş bazar nikbinliyi yaradıb. Xüsusilə çip istehsalı və süni intellekt sahəsində fəaliyyət göstərən şirkətlərin səhmlərində artım müşahidə olunub.

• Renesas Electronics Corp-ın səhmləri 8% bahalaşaraq Nikkei indeksində Hitachi-dən sonra ikinci yeri tutub,

• Advantest Corp.-ın səhmləri 3,4%,

• Tokyo Electron Ltd.-nin səhmləri isə 2,3% artıb,

• OpenAI-yə böyük həcmdə sərmayə yatıran texnoloji nəhəng  SoftBank Group Corp-ın səhmləri 3,6% bahalaşıb.

Bazar analitikləri: “Strateji əməkdaşlıq mühüm siqnaldır”

Analitiklərin fikrincə, bu əməkdaşlıq Yapon sənaye sektorunun süni intellekt və enerji infrastrukturu sahəsində qlobal miqyasda mövqeyini gücləndirə bilər. Eyni zamanda, çip istehsalçıları və texnologiya şirkətləri üçün də yeni bazar imkanlarının açılacağı gözlənilir.