Artıq ölkəmizdəki bütün McDonald’s restoranları yerli ət məhsullarından istifadə edir

McDonald’s restoranları artıq 25 ildən çoxdur ki, Azərbaycanda uğurlu işi və spesifik burger reseptləri ilə dad təcrübəsi yaşadır.

Lakin bəzən insanları burada istehlak olunan məhsulların, xüsusilə ət məhsullarının haradan idxal olunması maraqlandırır. Bugünlərdə “McDonald’s Azərbaycan” şirkəti media nümayəndələri üçün xüsusi press-tur təşkil etdi və biz hər şeyin canlı şahidi olduq.

“McDonald’s Azərbaycan” 2025-ci ilin əvvəlindən başlayaraq respublikanın ən böyük ət istehsalçılarından biri kimi tanınan Halal və İSO 22000 sertifikatlarına malik  “AzProtein Foods Group” ilə əməkdaşlıq edir. Onu da əlavə edək ki, bu vaxta qədər şirkət lazım olan ət məhsullarını müxtəlif xarici ölkələrdən idxal edirdi və həmin məhsulların yüksək keyfiyyətli, 100%  mal əti olmasına xüsusi diqqət yetirirdi.

Artıq “AzProtein Foods Group” ilə əməkdaşlıqdan sonra müəssisədə məhz McDonald’s tələblərinə və yüksək keyfiyyət standartlarına cavab verən xüsusi sahə yaradılıb. Bu sahə ən müasir texnologiya ilə təmin olunub və müxtəlif ölkələrdə təlim keçən işçilər tərəfindən idarə olunur. Bildirək ki, bu əməkdaşlığa məhz 2 illik beynəlxalq audit yoxlamalarından sonra başlanılıb.

McDonald’s burgerləri üçün istifadə olunan heyvanlar “Yalama” Aqroparkında yetişdirilir. Müəssisədə hər heyvan öz İD kodu ilə izlənilir, kəsimdən bişirilməsinə qədər ət bütün mərhələlərdə həkim və laboratoriya nəzarətində olur. Xüsusilə qeyd edək ki, burada heyvanların əsl islami kəsim qaydalarına uyğun kəsildiyinin də şahidi olduq.

McDonald’s öz burger ətlərinin ləzzətinə və keyfiyyətinə xüsusi önəm verir və elə bu səbəbdən də ətlər təzə şəkildə tam steril şəraitdə, xüsusi avadanlıqlar vasitəsilə uzun-uzadı təmizlənmə mərhələsindən keçdikdən sonra qablaşdırılaraq mənfi 18-23 dərəcəlik dondurucularda saxlanılır. Hazırlanan burger ətlərinin tərkibi və yağlılıq dərəcəsi son mərhələdə 13 parametr üzrə yenidən xüsusi laboratoriyadan keçir və bişirilmə testindən sonra istehlaka buraxılır. Burger ətləri xüsusi reseptə uyğun olmaqla, təyin olunmuş temperatur və bişirilmə müddətinə nəzarət edilərək hazırlanır.

Qeyd edək ki, “McDonald’s” şirkəti məhsulların keyfiyyətini və beynəlxalq standartlara uyğunluğunu ölçmək məqsədilə hər il beynəlxalq auditorların iştirakı ilə elan olunmamış yoxlamalar keçirir və bununla da yüksək keyfiyyət standartları nəzarətdə saxlanılır. Bundan əlavə, bura AQTA-nın əməkdaşları tərəfindən mütəmadi yoxlamalardan keçir.

Məlumatınız olsun ki, ölkəmizdə fəaliyyət göstərən bütün McDonald’s restoranlarında təkcə ət məhsulları deyil, həmçinin digər bir çox məhsullar məhz yerli istehsaldır. Şirkət bu addımı atmaqla həm yerli istehsalata xüsusi dəstəyini vurğulayır, həm də McDonald’s müştəriləri üçün öz keyfiyyət standartlarını daha da yüksəldir.

McDonald’s  restoranlarında siz də burger ətlərinin ləzzətindən, keyfiyyətindən, steril şəraitdə, islami qaydalara uyğun kəsimindən tam əmin ola bilər, rahatlıqla dada bilərsiniz.

Günay Camalqızı