Dünyaca məşhur qəhvəxana şəbəkəsi Starbucks, 1 milyard dollarlıq restrukturizasiya proqramı çərçivəsində mağazalarının bir qismini bağlayacağını və 900 nəfəri işdən azad edəcəyini açıqlayıb.

Marja.az-ın məlumatına görə, Şirkət bildirib ki, 2025-ci maliyyə ilində Şimali Amerikada mağaza sayı ümumilikdə 1% azaldılacaq və şirkət ABŞ ilə Kanadada 18 min 300 mağaza fəaliyyət göstərəcək. Növbəti mərhələdə isə yeni filiallar açmaq və minə yaxın mövcud mağazanı yeniləmək planlaşdırılır.

“Maliyyə ilini ABŞ və Kanadada şirkətə məxsus və lisenziyalı olmaqla ümumilikdə 18 300 mağaza ilə başa vuracağıq”, - Starbucks-ın baş icraçı direktoru Brian Niccol deyib.

Qazanc gətirməyən mağazalar bağlanacaq

Şirkət, apardığı təhlildən sonra mənfəət gətirməyən mağazaları bağlamaq qərarına gəlib. Starbucks-ın baş icraçı direktoru Brian Niccol, restoranları daha cəlbedici məkana çevirmək niyyətindədir.

Niccol, bir ildən çoxdur davam edən satış azalmasından sonra şirkətdə dəyişikliyə nail olmaq istəyir. O, şəbəkələri canlandırmaq üçün filiallarda əlavə oturacaq yerləri və elektrik yuvaları quraşdırmağı planlaşdırır.

Menyunun sadələşdirilməsi

Starbucks, maliyyə ilinin üçüncü rübünə dair satış və mənfəət göstəricilərinin gözləntilərindən aşağı qaldığını bildirib. Şirkət həm ABŞ, həm də Çin bazarında daha sürətli və ucuz içkilər təklif edən kiçik şəbəkələrlə artan rəqabətlə üz-üzədir.

Bu səbəbdən şirkət menyunu sadələşdirərək içki hazırlanmasının mürəkkəbliyini və gözləmə vaxtlarını azaltmaq, həm də dəyişən istehlakçı zövqlərinə uyğun yeni məhsullara yer açmaq istəyir.

Müştərilərin sağlam həyat tərzinə yönəlməsi fonunda Starbucks “şəkərsiz” seçimlərin sayını artırıb və zülal tərkibli içkiləri bazara çıxarıb.

İkinci böyük ixtisar dalğası

Bu, şirkətin il ərzində həyata keçirdiyi ikinci ixtisar dalğasıdır. 2025-ci ilin fevralında Starbucks 1100 işçisini və yüzlərlə vakant mövqeni ixtisar etmişdi.