Çin texnologiya nəhəngi Alibaba Group Holding, süni intellekt (AI) sahəsindəki investisiyalarını ilkin 50 milyard dollarlıq hədəfinin üzərinə çıxarmaq planlarını açıqladıqdan sonra, şirkətin səhmələri 2021-ci ilin noyabrından bu yana ən yüksək səviyyəyə çatıb.

Marja xəbər verir ki, Alibaba-nın İcraçı direktoru Eddie Wu, qlobal miqyasda süni intellekt yatırımlarının növbəti beş il ərzində 4 trilyon dollara çatacağını proqnozlaşdırır və şirkətin bu tempə uyğun hərəkət etməsinin vacibliyini vurğulayıb.

Wu fevral ayında, gələn üç il ərzində AI modelləri ilə şirkətin infrastrukturunu təkmilləşdirmək üçün 380 milyard yuan (təxminən 53 milyard dollar) həcmində planlarını genişləndirəcəyini açıqlamışdı. Çərşənbə günü Hangzhouda keçirilən konfransda isə Wu bildirib: “Sektorun böyümə sürəti gözləntilərimizi xeyli üstələyir. AI infrastrukturuna olan tələbat da proqnozlarımızdan yüksəkdir. Buna görə 380 milyard yuanlıq AI yatırımı aktiv şəkildə davam etdirilir və əlavə investisiyalar planlaşdırılır.”

Bu açıqlamalardan sonra Alibaba səhmələri Honq Konq birjasında 7,2% yüksəlib. Çinli çip istehsalçılarından ACM Research (Shanghai) 15%, NAURA Technology Group isə 10% dəyər qazanıb.

Süni İntellekt İnvestisiyalarında Artım

Huawei Technologies və Tencent Holdings kimi Çin texnologiya nəhəngləri də süni intellekt sahəsinə rekord səviyyədə investisiya qoyur. Bu şirkətlər, iqtisadiyyatı dönüştürmə potensialı daşıyan texnologiyanı inkişaf etdirmək və yaymaq üçün OpenAI və Meta kimi Amerikan rəqiblərinin investisiya yarışına qatılırlar.

Bloomberg Intelligence məlumatlarına görə, yalnız 2025-ci ildə Alibaba, Tencent, Baidu və JD.com-un süni intellekt infrastrukturu və xidmətlərinə yönələn ümumi kapital xərcləri 32 milyard dolları keçə bilər. Bu rəqəm, 2023-cü ildəki təxminən 13 milyard dollarlıq səviyyə ilə müqayisədə ciddi artımı göstərir.