Azərbaycanın aparıcı mebel istehsalçılarından olan Gardashlar Mebel bu dəfə ofis əməkdaşlarının rifahına yönəlmiş addımı ilə diqqət çəkib.

Marja xəbər verir ki, müasir iş şəraitində uzun saatlar kompüter qarşısında çalışan əməkdaşların ehtiyaclarını nəzərə alaraq, şirkət xüsusi universal istirahət yatağı hazırlayıb. Yeni model həm iş prosesində noutbuk üzərində rahat oturaraq işləməyə, həm də qısa fasilələr zamanı uzanaraq dincəlməyə imkan verir. Məhsulun dizaynında ergonomik yanaşma əsas götürülüb, brend rəngləri və loqosu ilə tamamlanaraq ofis mühitinə uyğun estetik görünüş yaradılıb. Məhsulun ən mühüm üstünlüklərindən biri onun çevik istifadəsidir – sadəcə bir toxunuşla dik vəziyyətdə dayana bilir, elə həmin rahatlıqla yerə qoyularaq tam istirahət imkanı yaradır.

Layihənin ideya müəllifi Gardashlar Mebel şirkətinin rəhbəri Əli Mirzəyevdir. Onun təşəbbüsü ilə həyata keçirilən bu addım yalnız Gardashlar Mebel əməkdaşlarının rifahına deyil, həm də ümumilikdə ölkədə işçi mədəniyyətinə yeni yanaşma gətirməyə yönəlib.

"Dünya miqyasında bir çox şirkətlər işçilərinin rifahına yatırım etməklə yanaşı, onların istirahəti üçün xüsusi imkanlar yaradır. Qərbdə artıq uzun illərdir ki, korporasiyalar əməkdaşların yalnız işini deyil, həm də sağlamlığını və gündəlik rahatlığını düşünür. Gardashlar Mebel isə bu yanaşmanı Azərbaycana gətirən və praktiki addıma çevirən ilk yerli şirkətlərdən biri oldu.

Bu təşəbbüs, ölkəmizdə də əməkdaş rifahının sadəcə sosial məsuliyyət deyil, həm də strateji uğur amili olduğunu göstərir. Gardashlar Mebel-in rəhbərliyi hesab edir ki, əməkdaşların rifahına edilən hər bir yatırım gələcəyin ən böyük qazancıdır. “Biz inanırıq ki, işçinin sağlamlığına və rahatlığına göstərilən diqqət onun işə münasibətini dəyişir. Daha güclü, daha motivasiyalı kollektiv – daha böyük nəticələr deməkdir,” – deyə Əli Mirzəyev vurğulayıb.

Əli Mirzəyev  əlavə edib ki, Şirkət bu innovativ yatağı yalnız öz işçiləri üçün deyil, həm də digər müəssisələr üçün istehsal etməyə hazırdır:

"İstənilən təşkilat modeli öz loqosu və rənglərinə uyğun sifariş edə bilər. Bu isə həm əməkdaşlara göstərilən qayğını, həm də korporativ kimliyi gücləndirməyi mümkün edir. Gardashlar Mebel-in təşəbbüsü təkcə bir məhsul deyil, iş dünyasına verilən mesajdır: əməkdaşların rifahı hər şirkətin strateji prioriteti olmalıdır. Azərbaycanda bu kimi addımların atılması yalnız şirkətlərin daxili mədəniyyətini zənginləşdirmir, həm də ölkənin biznes mühitində yeni standart yaradır".

Gardashlar Mebel əməkdaş rifahına yönəlmiş innovativ həllər sahəsində ilk addımını smart masa ilə atmışdır. Həmin model sayəsində işçilər uzun saatlar təkcə oturaq yox, ayaqüstə də işləyə bilirdilər. Yeni universal istirahət yatağı isə bu yanaşmanın davamı olaraq daha geniş imkanlar təqdim edir.