Beynəlxalq birjalarda dolların zəifləməsi və ABŞ dövlət istiqrazlarının gəlirliliyinin enməsi fonunda qızıla tələb artıb. Qiymətli metal 3689$ səviyyəsinə qədər artaraq tarixi maksimuma yüksəlib. Hazırda qızıl 3685$-a ticarət olunur.

Cari ilin əvvəlindən bəri qızılın qiyməti təxminən 35% bahalaşıb. 2024-cü ilin yekununda isə artım 27% olmuşdu. Bu yüksəlişə qlobal mərkəzi bankların qızıl alışı, monetar siyasətin yumşaldılması, həmçinin ümumi geosiyasi və iqtisadi qeyri-müəyyənliklər də təsir göstərib.

EURUSD valyuta cütlüyü cari həftənin əvvəlindən 1.17160 həddindən 1.17870 həddinə kimi yüksəlib. GBPUSD cütlüyü eyni müddət ərzində 1.35410 səviyyəsindən 1.36230 səviyyəsinədək bahalaşıb. USDCAD cütlüyü isə 1.38410-dən 1.37630-ə qədər kəskin dəyər itirib.

Bazar ertəsi axşamı Uoll-Stritdə daha bir uğurlu sessiya müşahidə olundu. “S&P 500” və “Nasdaq Composite” ticarətin bağlanışında tarixi maksimumlara yüksəldi, xüsusilə də “S&P 500” ilk dəfə olaraq 6600 bəndi keçdi.

İnvestorlar Trampın Çinlə ticarət danışıqları barədə verdiyi müsbət açıqlamaları izləyirlər. Bir sıra iri texnoloji şirkətlərin səhmlərinin qiymətinin artması müşahidə olunub: “Alphabet” səhmləri 4%-dən çox, “Tesla” səhmləri isə 3%-dən artıq bahalaşdı.

Həmçinin, Yaponiyanın “Nikkei 225” indeksi 45 000 bənd səviyyəsini keçərək yeni tarixi rekorda çatdı. Bu, Asiya-Sakit Okean bazarlarında artıma səbəb oldu. Lakin prosesə, ABŞ maliyyə naziri Skott Bessentin elan etdiyi Çinə məxsus “TikTok”-un satışına dair “çərçivə sazişi” müəyyən qədər kölgə saldı. Bessentin sözlərinə görə, kommersiya şərtləri artıq razılaşdırılıb. Qeyd olunur ki, Tramp və Çin sədri Si Cinpin 19 sentyabr, cümə günü sazişin şərtlərini müzakirə etmək üçün əlaqə saxlayacaqlar.

Bu gün ABŞ-da açıqlanacaq Pərakəndə Satış Dövriyyəsinin Həcmi investorların diqqət mərkəzində olacaq əsas xəbərlərdən biridir. Eləcə də, Böyük Britaniyada dərc olunacaq Orta Əməkhaqqı Səviyyəsi və İşsizlik Səviyyəsi, Almaniyada açıqlanacaq İqtisadi İnkişaf Proqnozu İndeksi, Avrozonda və ABŞ-da dərc olunacaq Sənaye Sektorunda İstehsal Həcmi göstəriciləri bazar iştirakçılarının marağına səbəb olacaq.

Məlumat İnvest-AZ İnvestisiya Şirkətinin analitikləri tərəfindən hazırlanılıb.