ABŞ Federal Ehtiyat Sisteminin (FED, ABŞ Mərkəi Bankı) müstəqilliyi itirilərsə və investorlar yığımlarının heç olmasa kiçik bir hissəsini ABŞ xəzinə istiqrazlarından qızıla yönləndirərlərsə, qızılın qiyməti bir troya unsiyası üçün demək olar 5000 dollara qədər yüksələ bilər.

Marja.az xəbər verir ki, bunu “Goldman Sachs” analitikləri hesab edirlər.

“Biz hesab edirik ki, ABŞ-da özəl mülkiyyətdə olan Xəzinə istiqrazlarının 1%-i belə qızıla yönəlsə, qiymət təxminən 5 000 dollara yüksələcək. Buna görə də qızıl, əmtəə bazarında ən güclü uzunmüddətli tövsiyəmiz olaraq qalır”, – deyə analitiklər vurğulayıb.

“FED-in müstəqilliyinin zəiflədiyi bir ssenari, çox güman ki, inflyasiyanın artmasına, səhmlərin və uzunmüddətli istiqrazların ucuzlaşmasına, həmçinin dolların ehtiyat valyuta statusunun zəifləməsinə gətirib çıxaracaq”, — deyə analitiklər öz hesabatlarında bildirirlər.

Onların sözlərinə görə, “Qızıl — institutlara inamdan asılı olmayan yığım vasitəsidir”.

“Goldman Sachs” qızıl qiymətləri üçün bir neçə ssenari görür:

• Baza ssenari — 2026-cı ilin ortalarınadək qiymətlərin 1 unsiya üçün 4000 dollara yüksəlməsi;

• Mülayim riskli ssenari — qiymətlərin 4500 dollara qədər artması;

• Yüksək riskli ssenari — investorların ABŞ xəzinə istiqrazlarının bir hissəsini sataraq qızıl alması və nəticədə qiymətin 5000 dollara yaxınlaşması.

Hazırda COMEX birjasında qızıl fyuçersləri 1 unsiya üçün 3600 dollardan bir qədər aşağı səviyyədə ticarət olunur. Bu həftənin əvvəlində kotirovkalar tarixdə ilk dəfə olaraq həmin həddi aşmışdı.

İş axtarmaq heç vaxt bu qədər həyəcanlı olmayıb! Hər gün yeni vakansiyalar, maaşı yüksək, etibarlı elanlar - AzVak.az-da. İndi bax, fürsəti qaçırma!

Bu il qızıl ən güclü nəticə göstərən əsas əmtəələrdən biri olub – 30%-dən çox bahalaşaraq, həftənin əvvəlində rekord səviyyəyə çatıb. Artım mərkəzi bankların qızıl ehtiyatlarını artırması və FED-in yaxın vaxtlarda faizləri azaldacağına dair gözləntilərlə dəstəklənib. Əlavə olaraq, Prezident Donald Trampın FED üzərində daha çox nəzarət əldə etmək cəhdləri, o cümlədən FED-in İdarə Heyətinin üzvü Liza Kuka (Lisa Cook-) un vəzifədən uzaqlaşdırılmasına yönəlmiş təşəbbüsləri də təsir göstərib.

Bununla belə, ABŞ mərkəzi bankının mövqeyinə təzyiqlər artdıqca, qlobal bazar liderləri mümkün nəticələrdən narahatlıqlarını ifadə ediblər. Avropa Mərkəzi Bankının prezidenti Kristin Laqard da qeyd edib ki, FED-in müstəqilliyini itirməsi dünya üçün “ciddi təhlükə” ola bilər.

Son məlumatlara görə, spot qızılın qiyməti bir unsiya üçün təxminən 3540 dollar təşkil edir. Çərşənbə günü isə qızıl tarixdə ilk dəfə 3578 dolları keçərək rekord qırıb.