Süni intellekt şirkəti Anthropic, 13 milyard dollarlıq F seriyası investisiya raundunu başa vuraraq, öz dəyərini 183 milyard dollara yüksəldib.

Marja xəbər verir ki, Şirkət açıqlamasında, toplanan vəsaitin korporativ mənimsəməni artırmaq, təhlükəsizlik tədqiqatlarını dərinləşdirmək və beynəlxalq genişlənməni dəstəkləmək üçün istifadə olunacağını bildirib.

Yatırım turuna Fidelity Management & Research Company və Lightspeed Venture Partners rəhbərlik edib. Digər iştirakçılar arasında Altimeter, Baillie Gifford, BlackRock, Blackstone, Coatue, D1 Capital Partners, Insight Partners, Ontario Teachers’ Pension Plan, Qatar Investment Authority və çoxsaylı korporativ investorlar, risk kapitalı fondları, dövlət sərvət fondları, özəl kapital və aktiv idarəçiləri olub.

Anthropic-in maliyyə direktoru Krishna Rao açıqlamasında bunları deyib:

"Müştəri bazamızda tələbatın eksponensial artımını görürük. Bu maliyyələşdirmə, investorların maliyyə göstəricilərimizə olan fövqəladə etimadını və misilsiz böyüməmizi dəstəkləmək üçün əməkdaşlığımızın gücünü nümayiş etdirir."

Bu investisiya raundu, şirkətin daha əvvəl 170 milyard dollarlıq dəyərlə 3–5 milyard dollar arasında vəsait toplamağa yaxınlaşdığı barədə xəbərlərdən sonra baş tutub. Həmçinin, sürətlənən API istifadəsi və korporativ mənimsəmə ilə birlikdə, 2025-ci il ərzində şirkətin illik gəlirinin 1 milyard dollardan 5 milyard dollara yüksəldiyi bildirilib.

Anthropic-in bloq yazısında qeyd olunub ki, şirkət hazırda 300 mindən çox korporativ müştəriyə xidmət göstərir və orta hesabla 100 min dollardan çox gəlir gətirən böyük müştərilərinin sayı ötən il ərzində təxminən 7 dəfə artıb.

Xatırladaq ki, Anthropic sonuncu dəfə 2025-ci ilin mart ayında 61,5 milyard dollarlıq dəyərlə 3,5 milyard dollar investisiya cəlb etmişdi.

Anthropic — etibarlı, izah edilə bilən və idarə oluna bilən süni intellekt sistemləri qurmaq üzərində çalışan süni intellekt təhlükəsizliyi və tədqiqat şirkətidir.