(®) Azərbaycanın qiymətli kağızlar bazarında aparıcı şirkətlərdən biri olan Unicapital və dünyaca məşhur Cbonds platforması yerli korporativ istiqrazlar üzrə əməkdaşlığa başlayıb.

Artıq Unicapital tərəfindən təqdim olunan Azərbaycan istiqrazlarının kotirovkaları Cbonds-un rəsmi saytında investorlar üçün əlçatan olacaq.

Hazırda platformada Unibank istiqrazlarının kotirovkaları təqdim edilir:

• Unibank (Azərbaycan) – 11,5% illik gəlirlilik, ödəniş tarixi 22.10.2027 (AZN)
• Unibank (Azərbaycan) – 8% illik gəlirlilik, ödəniş tarixi 26.12.2030 (USD)
• Unibank (Azərbaycan) – 8% illik gəlirlilik, ödəniş tarixi 29.05.2031 (USD)

“Azərbaycan bazarı bizim üçün regionda mühüm mövqe tutan dinamik bir bazar kimi xüsusi maraq kəsb edir. Portfellərinin diversifikasiyası üçün yeni imkanlar axtaran beynəlxalq investorların diqqəti də məhz bu bazara yönəlib. Unicapital-ın kotirovkaları hesabına Cbonds-un təqdim etdiyi məlumat bazasının genişlənməsi müştərilərimizə ölkənin borc alətləri bazarı haqqında daha dolğun və aktual məlumat əldə etməyə imkan verəcək.

Biz bu tərəfdaşlığı uzunmüddətli və səmərəli əməkdaşlığın başlanğıcı kimi görürük və Azərbaycandakı partnyorlarımızla əlaqələri genişləndirməyi planlaşdırırıq”, - deyə Cbonds-un MDB və Çin borc alətləri bazarlarının Departament rəhbəri Aleksandr Budarin şərh edib.

"Cbonds kimi nüfuzlu bir platforma ilə əməkdaşlıq Unicapital üçün strateji əhəmiyyət daşıyır. Bu tərəfdaşlıq yerli istiqrazlarımızın qlobal maliyyə bazarlarında daha geniş tanınmasına, beynəlxalq investorların Azərbaycana marağının artmasına və ölkənin kapital bazarının inkişafına mühüm töhfə verəcək”, – deyə Unicapital İnvestisiya Şirkətinin Baş direktoru Vüqar Namazov bildirib.

Qeyd edək ki, Cbonds maliyyə bazarları üzrə universal məlumat platformasıdır. Platforma istiqrazlar, səhmlər, ETF və fondlar, indekslər, xəbərlər, analitika və reytinqlər barədə geniş və aktual məlumat təqdim edir. İstifadəçilərə həm veb-sayt, həm də mobil tətbiq üzərindən rahat çıxış imkanı yaradılır.