İsveçrənin qida nəhəngi Nestle şirkəti, İcraçı direktoru Laurent Freixe-nin bir şirkət əməkdaşı ilə gizli romantik münasibətini açıqlamaması səbəbilə vəzifəsindən qəfil azad edildiyini açıqlayıb. Bu qərar, Freixe-nin vəzifəyə təyin edilməsindən düz bir il sonra verilib.

Marja.az xəbər verir ki, Şirkət, KitKat-dan Nesquik-ə qədər məhsulları ilə tanınan Nestle-də İcraçı direktoru vəzifəsinə, Nespresso kahvə bölməsinin rəhbəri olan təcrübəli menecer Philipp Navratil-in təyin edildiyini bildirib.

İcraçı direktorun qəfil vəifədən azad edilməsi, Nestle üçün çətin istehlakçı mühiti və ABŞ-ın ticarət tariflərinin yaratdığı narahatlıq fonunda daha çox dəyişkənliyə səbəb ola bilər.

Nestle, Freixe-nin vəzifədən azad edilməsinin, İdarə Heyətinin sədri Paul Bulcke və Müstəqil Direktor Pablo Isla tərəfindən aparılan araşdırma nəticəsində şirkətin etik qaydalarını pozan gizli romantik münasibətlə əlaqəli olduğunu açıqlayıb.

Paul Bulcke deyib: “Bu zəruri bir qərar idi. Nestle-nin dəyərləri və idarəetməsi şirkətimizin möhkəm təməlidir. Laurentə uzun illər ərzində verdiyi xidmətlər üçün təşəkkür edirik.”

Şirkət iyunda açıqlamışdı ki, uzun müddət sədrlik edən Paul Bulcke gələn il vəzifəsindən ayrılacaq.

Reuters-ə danışan şirkət nümayəndəsi bildirib ki, Freixe ilə birbaşa əməkdaşı arasında ola biləcək münasibət barədə ilkin narahatlıqlar yaz mövsümündə ortaya çıxıb. İdarə Heyəti dərhal araşdırma aparsa da, ilkin nəticələr qənaətbəxş olmayıb.

Narahatlıqlar davam etdikcə şirkət ikinci araşdırmanı həyata keçirib. Bu araşdırma Bulcke və Isla tərəfindən, xarici bir şirkətin dəstəyi ilə aparılıb və Laurent Freixe-nin bir işçi ilə münasibəti təsdiqlənib. Freixe ilkin mərhələdə bu münasibəti idarə heyətinə inkar etmişdi.

Nestle bildirib ki, vəzifəsindən azad edilən rəhbər hər hansı çıxış pulu almayacaq.

Bu qəfil dəyişiklik, Freixe-nin əvvəlki İcraçı Direktoru Mark Schneider-in vəzifədən çıxarılmasından düz bir il sonra baş verir. Şirkət strategiya və məqsədlərdə dəyişiklik etməyəcəyini bildirib, amma bu, Nestle-nin ortamüddətli istiqaməti barədə suallar yaradır. JP Morgan analitikləri qeyd ediblər ki, “Bu dəyişiklik şirkətin orta müddətli istiqaməti barədə sualları canlı saxlayacaq.”

Nestle səhmləri son bir ildə 17% düşərək rəqibləri və ümumi bazardan geri qalır.

Bu qəfil direktor dəyişikliyi, 2025-ci ildə qlobal istehlak malları və qida şirkətlərində baş verən idarəetmə dəyişikliklərinin növbəti nümunəsidir. Nestle ilə rəqabət aparan Unilever, Diageo və Hershey-də də oxşar dəyişikliklər olub.

Philipp Navratil Nestle-də karyerasına 2001-ci ildə daxili auditor kimi başlayıb. Mərkəzi Amerikada müxtəlif kommersiya vəzifələrində çalışdıqdan sonra 2009-cu ildə Nestle-nin Honduras üzrə ölkə meneceri təyin edilib. 2013-cü ildə Meksikada kahvə və içki biznesinə rəhbərlik edib, 2020-ci ildə Nestle-nin Strateji qəhvə biznes bölməsinə keçib. 2024-cü ilin iyulunda Nespresso-ya keçib və bu ilin yanvar ayının 1-də Nestle-nin icra heyətinə qoşulub.