SABAH.school – övladınızı yalnız imtahanlara deyil, sabahın dünyasına hazırlayan müasir məktəb – ilk tədris ilini uğurla tamamladı və Azərbaycanda təhsilin keyfiyyətinə yeni yanaşma gətirdi.

Məktəb Beynəlxalq Bakalavriat (IB) təşkilatından lisenziya üçün rəsmi namizəd statusu alaraq qlobal səviyyədə tanınan təhsil müəssisəsinə çevrilmək yolunda mühüm addım atıb. Bu isə burada təhsil alan şagirdlərin diplomlarının dünya üzrə tanınması və məktəbin yüksək standartlara uyğun fəaliyyət göstərməsi deməkdir.

Tədrisi ingilis dilində aparılan SABAH.school həm akademik nəticələr, həm də sosial-emosional inkişaf sahəsində fərqlənir. Hazırda məktəb məktəbəqədər mərhələdən 4-cü sinifədək 50-dən çox şagirdə təhsil təqdim edir. Burada hər bir uşağın fərdi inkişaf trayektoriyası izlənilir, yumşaq bacarıqları və emosional intellekti xüsusi diqqətlə qiymətləndirilir. Valideyn rəyləri göstərir ki, məktəb qısa müddətdə etibarlı və innovativ model kimi tanınıb.

Təhsil prosesi IB-in  Primary Years Programme (PYP) çərçivəsində formativ qiymətləndirmə prinsiplərinə əsaslanır. Öyrənmə jurnalları, portfoliolar, həmyaşıd və özünüqiymətləndirmə vasitəsilə hər bir uşağın güclü tərəfləri və inkişaf ehtiyacları müəyyənləşdirilir. Dərslərdə müasir texnologiyaların və süni intellekt alətlərinin tətbiqi, real layihələr üzərində işləmək isə şagirdlərin gələcək peşəkar mühitə daha yaxşı hazırlaşmasına şərait yaradır.

Məktəbdə “şagird–məktəb–valideyn üçbucağı” fəlsəfəsi həyata keçirilir. Valideynlər açıq dərslərdə, tədbirlərdə və layihələrdə fəal iştirak edərək övladlarının təhsilinə yaxından qoşulurlar. Bu yanaşma həm uşaqlara əlavə motivasiya qazandırır, həm də ailə ilə məktəb arasında güclü tərəfdaşlıq yaradır.

SABAH.school-un yerləşdiyi Sea Breeze rezidentləri üçün xüsusi 5%-lik endirim nəzərdə tutulub. Bu üstünlük valideynlər üçün məktəbi daha əlçatan etməklə yanaşı, SABAH.school-un icma ilə sıx inteqrasiyasına xidmət edir. Məktəb burada yalnız bir təhsil müəssisəsi deyil, həm də müasir həyat tərzinin bir parçası kimi formalaşır.

Gələcək planlara gəlincə, SABAH.school yaxın illərdə Bakı şəhərində yeni kampusun açılmasını və IB-in Middle Years Programme (MYP, 5–9-cu siniflər) üzrə dərslərə start verməyi hədəfləyir. Məktəb hər il yeni sinif səviyyələri əlavə etməklə, üç il ərzində 11-ci sinifədək tam təhsil spektri təqdim etməyi planlaşdırır.

SABAH.school-un əsas məqsədi Azərbaycan məktəb mühitinə beynəlxalq səviyyəli keyfiyyət gətirmək, uşaqları yalnız imtahanlara deyil, həm də dəyişən dünyaya hazırlamaqdır. Yeni tədris ili isə bu missiyanın daha geniş miqyasda həyata keçirilməsinə imkan yaradacaq.

Əlaqə: info@sabahhub.com
Vebsayt:www.sabahhub.com