Ölkənin aparıcı korporativ maliyyə institutu “PAŞA Bank” işğaldan azad edilmiş ərazilərin minalardan təmizlənməsi istiqamətində həyata keçirilən mühüm layihələrə verdiyi dəstəyi davam etdirir.

Bu il Bank Azərbaycan Respublikasının Minatəmizləmə Agentliyinə (ANAMA) daha iki xüsusi təlim keçmiş minaaxtaran iti ianə edib. Belçika Malinuası cinsinə məxsus, “Inam” və “Ümid” adları verilmiş itlər beynəlxalq standartlara uyğun xüsusi təlim proqramını uğurla tamamlayıb və yaxın günlərdə Füzuli rayonunda minalardan təmizləmə əməliyyatlarında iştirak edəcəklər.

İdarə Heyətinin sədri, baş icraçı direktor Cavid Quliyevin sözlərinə görə, “PAŞA Bank” ölkəmizin aparıcı korporativ bankı olaraq yalnız iqtisadiyyatın inkişafına töhfə verən maliyyə xidmətləri ilə deyil, həm də cəmiyyətimiz üçün strateji əhəmiyyət daşıyan sosial layihələrə dəstək göstərməklə fəxr edir.

“İşğaldan azad olunan ərazilərin minalardan təmizlənməsi, yenidən canlanaraq inkişaf və tərəqqi ilə çiçəklənməsi mühüm addımdır. İnanırıq ki, məsuliyyətli korporativ vətəndaş kimi reallaşdırdığımız bu təşəbbüs Azərbaycanın daha təhlükəsiz, dayanıqlı və rifahlı gələcəyinin qurulmasına töhfə verəcək”, - deyə, C.Quliyev bildirib.

ANAMA-nın İdarə Heyəti sədrinin müavini Samir Poladov “PAŞA Bank”ın humanitar minatəmizləmə fəaliyyətinə verdiyi dəstəyin xüsusi əhəmiyyətini vurğulayıb.

“İşğaldan azad olunmuş ərazilərin yenidən qurulması və keçmiş məcburi köçkünlərin doğma yurdlarına təhlükəsiz qayıdışı istiqamətində görülən humanitar minatəmizləmə fəaliyyətinə verdiyi dəstəyə görə “PAŞA Bank”a minnətdarıq. Bu prosesdə minaaxtaran itlərin tətbiqi ən səmərəli üsullardan biridir”, - deyə, S.Poladov qeyd edib.

Xatırladaq ki, “PAŞA Bank” həmçinin 2021-ci ildə ANAMA və ABŞ-ın Marşal İrsi İnstitutu (MLI) arasında imzalanmış Anlaşma Memorandumu çərçivəsində Azərbaycana xüsusi təlim keçmiş 30 minaaxtaran itin gətirilməsinə də töhfə verib.