Dünən İngiltərə və Avrozonada açıqlanan İstehlak Qiymətləri İndeksi (CPİ) göstəriciləri, regionların inflyasiya trendlərini izləyən iqtisadçılar və bazar iştirakçıları üçün mühüm məlumatlar təqdim etdi.

İngiltərədə illik inflyasiya iyul ayında 3.8% səviyyəsinə yüksəlmişdir ki, bu da, bazar iştirakçılarının gözləntiləri olan 3.7% proqnozlarını aşdı. Bu artımda əsas rol benzin və qida qiymətlərinin əvvəlki ayla müqayisədə yüksəlməsi idi. Aylıq bazda isə CPİ 0.1% artmışdır. İstehlak Qiymərlərinin Baza İndeksi (Core CPİ) isə  2.7% səviyyəsində sabit qaldı ki, bu da, İngiltərə Bankının (BoE) hədəfi olan 2% səviyyəsindən bir qədər yüksəkdir.

Avrozonada isə illik CPİ 2.0% səviyyəsində sabit qaldı və gözləntilərlə tam uyumlu oldu. Manşet inflyasiya aylıq müqayisədə dəyişməz qalaraq 0.0% artım göstərdi. Baza inflyasiya isə illik müqayisədə 2.3% səviyyəsində qalaraq qiymət təzyiqlərinin nəzarət altında olduğunu göstərdi. Bu göstəricilər, Avropa Mərkəzi Bankının (ECB) faiz siyasətinə dair ehtiyatlı və stabilləşdirici tonunu dəstəkləyir.

Dünən FED-in 17–18 iyul 2025-ci il tarixində keçirilmiş son Açıq Bazar Komitəsi (FOMC) toplantısının protokolları dərc olunmuşdur. Protokollarda, Amerika iqtisadiyyatının yavaşlamasına baxmayaraq işsizlik səviyyəsinin sabit qaldığı və inflyasiyanın əsasən hədəf olan 2% səviyyəsinə yaxın olduğu qeyd edilmişdir.

FED nümayəndələri faiz dərəcələrinin cari səviyyədə saxlanılmasının, iqtisadi aktivlikdəki yavaşlamaya qarşı ehtiyatlı siyasət kimi qəbul edilməli olduğunu vurğulamışdır. Eyni zamanda, bəzi nümayəndələr iqtisadiyyatın gözləniləndən daha güclü performans göstərdiyi hallarda faizlərin artırılmasının nəzərdən keçirilə biləcəyini qeyd etmişdir.

Protokollarda həmçinin kredit bazarlarında qeyri-müəyyənliklərin davam etdiyi və qlobal bazarlardakı təzyiqlərin ABŞ maliyyə bazarları üçün risk yaratdığı bildirilmişdir.

İngiltərə və Avrozonada inflyasiya göstəricilərinin proqnozlarla uyğun gəlməsi, valyuta bazarlarında nisbi sabitliyə səbəb oldu. FED protokollarının dərc olunması, investorların ABŞ faiz siyasətində sabitlik gözləmələrini gücləndirdi və ABŞ istiqraz bazarında uzunmüddətli istiqrazların gəlirlilik səviyyəsi bir qədər aşağı düşdü. Bu, qlobal maliyyə bazarlarında riskli aktivlərə (aksiyalar və xam neft kimi aktivlərə) marağın artmasına gətirib çıxardı. Brent neftinin qiyməti 67.20$ səviyyəsinə qalxaraq son bir həftənin yüksəlişini davam etdirdi.

Bugün Böyük Britaniyada, Avrozonada, Almaniyada və Amerikada açıqlanacaq sənaye və xidmət sektorlarında, həmçinin kompozit Biznes Aktivliyi İndeksi göstəriciləri bazarın fokuslandığı ən önəmli xəbərlərdir. 

Məlumat İnvest-AZ İnvestisiya Şirkətinin analitikləri tərəfindən hazırlanıb.