Qlobal valyuta bazarlarında gözlər bu həftə FED sədri Cerom Pavelin “Jackson Hole” Simpoziumundakı çıxışa yönəlib. Son dövrlərdə FED-in monetar siyasəti ilə bağlı gözləntilər sürətlə dəyişib. İyul ayı göstəriciləri aqressiv faiz endirimi ehtimallarını zəiflədərkən, bazarlarda sentyabr iclasına dair qiymətləndirmələr böyük ölçüdə daralıb.

İnvestorlar hesab edirlə ki, əgər Pavel çıxışında ehtiyatlı bir ton götürərsə, dollar inkişaf etmiş və inkişaf etməkdə olan valyutalara qarşı üstünlük qazana bilər. Xüsusilə bazarın hələ yüksək səviyyədə endirim gözləntisi daşıdığı nəzərə alınsa, ölçülü mesajlar dollar indeksini (DXY) yuxarıya doğru hərəkət etdirə biləcək katalizator ola bilər.

ABŞ iqtisadiyyatı son aylarda ziddiyyətli siqnallar verir. Bir tərəfdən pərakəndə satışlardakı artı istehlakın hələ də güclü qaldığını göstərir. Lakin, idxal qiymətlərindəki artım tariflərin maliyyə təzyiqini artırır. Bu vəziyyət, irəlidə pərakəndə qiymətlərə əks oluna biləcəyi üçün inflyasiya riskini canlı saxlayır. Digər tərəfdən, işsizlik bazarı ciddi şəkildə zəifləyib. İşsizlik səviyyəsi 4.2%-ə yüksəlib, üç aylıq orta məşğulluq artımı isə 35 minə qədər azalıb.

Keçən il oxşar bir tablo ilə qarşılaşan Pavel, “Jackson Hole” çıxışında “faiz endirimi yaxındır” mesajı vermişdi. Lakin, bu il vəziyyət bir qədər mürəkkəbdir. Çünki inflyasiya tərəfdən İstehsal Qiymətləri İndeksi göstəriciləri kəskin artıb; manşet inflyasi 3.5%-ə, baza inflyasiya isə 3.7%-ə yüksəlib. Bu isə FED-in sürətli addımlar atmasını çətinləşdirir. Yəni Pavel bu il əvvəlki kimi rahatlıqla “göyərçin” açıqlamalar verə bilməyəcək. Daha ehtimal olunan ssenari, həm məşğulluğun, həm də inflyasiyanın gedişatını yaxından izlədiklərini vurğulayan, ehtiyatlı bir mövqe ola bilər.

Bugün Böyük Britaniyada və Avrozonada açıqlanacaq İstehlak Qiymətləri İndeksi göstəriciləri bazarın fokuslandığı ən önəmli xəbərlərdir. 

Bakı vaxtı ilə saat 22:00-da isə Federal Ehtiyyatlar Sistemi Federal Açıq Bazar Komitəsinin son toplantısının protokolları dərc olunacaq.

Məlumat İnvest-AZ İnvestisiya Şirkətinin analitikləri tərəfindən hazırlanıb