“Suraxanı Maşınqayırma Zavodu” ASC-nin səhmlərinin əmək kollektivinə güzəştli satışına başlanılıb.

Marja xəbər verir ki, 18 milyon 840 min manat nizamnamə kapitalına malik olan ASC 9 milyon 420 min 31 ədəd səhm buraxıb. Güzəştli satışa çıxarılmış səhmlərin sayı 1 milyon 413 min 5 ədəd (buraxılmış səhmlərin 15%-i və ya 2 milyon 826 min manatlıq hissəsi ), bir səhmin nominal qiyməti 2 manatdır. 

Aşağıdakı şəxslər səhmləri güzəştlə almaq hüququna malikdirlər:

- əsas iş yeri həmin müəssisə sayılan işçilər;

- Azərbaycan Respublikası qanunvericiliyinə uyğun olaraq, həmin müəssisələrdə əvvəlki iş yerinə qayıtmaq hüququ olan şəxslər;

- özəlləşdirilən müəssisədə 7 (yeddi) ildən çox çalışmış və həmin müəssisədən təqaüdə çıxmış şəxslər;

- 1 yanvar 1995-ci il tarixindən sonra işçilərin say tərkibinin ixtisarı nəticəsində işdən azad olunmuş və işsiz statusu almış şəxslər.

Güzəştli satışa sifarişlər müəssisədə fəaliyyət göstərən özəlləşdirmə komissiyası tərəfindən 23 sentyabr – 17 oktyabr 2025-ci il tarixinə kimi qəbul edilir.

Sifarişlərin verilməsi və güzəştli satışın keçirilməsi haqqında məlumatları səhmdar cəmiyyətin yerləşdiyi ünvandan almaq olar.

Güzəştli satışda iştirak etmək istəyən əmək kollektivi üzvlərindən və onlara bərabər tutulan şəxslərdən “Qiymətli kağızlar bazarı haqqında” Azərbaycan Respublikasının Qanununa müvafiq olaraq İnvestisiya şirkətlərində depo hesabın açılması tələb olunur.

Güzəştli satışın yekunlarını təsdiq etmək üçün 17 oktyabr 2025-ci il tarixdə müəssisədə iştirakçıların ümumi yığıncağı keçiriləcək. Güzəştli satışın yekun sənədləri Hərracların Təşkili Mərkəzi publik hüquqi şəxsinə təqdim edilməlidir.

Hər hansı səbəbdən müəyyən edilmiş müddətdə güzəştli satış baş tutmadıqda, həmin səhmlər qanunvericiliyə uyğun olaraq istifadə olunur.

Güzəştli satışda yeganə ödəniş vasitəsi Azərbaycan manatıdır.