“Ümid-Babək” yatağında qiymətləndirmə quyusunun qazılması bu ilin sentyabrına planlaşdırılıb

“Ümid-Babək” yatağında qiymətləndirmə quyusunun qazılması bu ilin sentyabrına planlaşdırılıb

“Ümid-Babək” yatağında qiymətləndirmə quyusunun qazılması bu ilin sentyabrına planlaşdırılıb

"Umid Babek Operation Company" (UBOC) əməliyyat şirkəti bu ilin sentyabrında Xəzərin Azərbaycan sektorunda yerləşən "Ümid-Babək" blokunun "Ümid" yatağında qiymətləndirmə quyusunun qazılmasına başlamağı planlaşdırır.

Bu barədə neft və qaz bazarındakı mənbə məlumat verib.

VTB-də yüksək depozit faizləri daha çox qazandırır

Bildirilib ki, qazma işləri 2025-ci ilin iyununda Azərbaycana gətirilən "Neptun" özüqalxan üzən qazma qurğusu vasitəsilə həyata keçiriləcək.

"Neptun" qazma qurğusu ilə qiymətləndirmə quyusunun qazılmasına bu ilin sentyabrında başlanılması planlaşdırılır. Quyunun layihə dərinliyi təxminən 7 min metrdir", - mənbə qeyd edib.

Daha əvvəl “Fitch Ratings” beynəlxalq reytinq agentliyinin hesabatına istinadən verilən məlumata görə, "Ümid" yatağının işlənməsinin ikinci mərhələsi çərçivəsində hasilata 2027-ci ilə qədər başlanılması gözlənilir.

Aprelin 1-nə olan məlumata görə, "Ümid" yatağının işlənməsinin birinci mərhələsi çərçivəsində ümumilikdə 11,2 milyard kubmetr qaz və 1,65 milyon ton qaz kondensatı hasil edilib.

Azərbaycan Dövlət Neft Şirkətinin (SOCAR) ilkin qiymətləndirmələrinə görə, "Ümid" yatağının Balaxanı VIII, Fasilə (B, C, D), Fasilə E, Qırməkiüstü və Qırməkialtı layları üzrə ehtiyatları 129 milyard kubmetr qaz və 20 milyon ton kondensatdan ibarətdir.

“Ümid” yatağının kəşfi 24 noyabr 2010-cu ilə təsadüf edir və Azərbaycanın müstəqillik dövründə SOCAR tərəfindən kəşf edilən ilk qaz-kondensat yatağı kimi tarixə düşüb. Yataq 2012-ci ildə istismara verilib.

“Ümid-Babək” blokunun kəşfiyyatı və işlənməsi üzrə Risk Service Contract (RSC) 2017-ci il yanvarın 12-də imzalanıb və həmin ilin mayında qüvvəyə minib. RSC çərçivəsində UBOC şirkətinin səhmdarları SOCAR (80 % iştirak payı) və "Nobel Upstream" (UK) şirkətləridir (20 %).

01.08.2025 13:49