ABŞ-da Qeyri-kənd Təsərrüfatı Sektorunda Yeni Yaranan İş Yerlərinin Sayı (NFP) göstəricisinin açıqlanması ərəfəsində dollar major valyutalar qarşısında bahalaşmaqda davam edir.

EUR/USD valyuta cütlüyü ötən gün 1.14600 səviyyəsinə qədər yüksəlsə də, yenidən 1.14050 səviyyəsinə qədər geriləyib. GBP/USD cütlüyü 1.32810 həddindən 1.31850 həddinə qədər ucuzlaşıb, USDJPY cütlüyü isə 148.580 həddindən 150.900 həddinə kimi artıb.

ABŞ prezidenti Donald Trampın imzaladığı yeni gömrük rüsumları ilə bağlı fərmanın qüvvəyə minməsi əvvəl planlaşdırıldığı kimi 1 avqustda deyil, bir həftə gec baş tutacaq. Bu tədbir gömrük və sərhəd xidmətinə yeni rüsumların yığılması üçün zəruri dəyişiklikləri həyata keçirməyə yetərli vaxt vermək məqsədi daşıyır. Ağ Evdən bildirib ki, rüsumların qüvvəyə minmə tarixinin dəyişdirilməsi rəsmi təxirə salma kimi qiymətləndirilməməlidir.

Kanadanın baş naziri Mark Karni bildirib ki, ABŞ prezidenti Donald Trampın Kanadaya qarşı ticarət rüsumlarının 1 avqustdan etibarən 25%-dən 35%-ə qaldırılması ilə bağlı imzaladığı fərman ölkə hökumətində məyusluq yaradıb. Buna baxmayaraq, Ottava Meksika və ABŞ ilə bağlanmış USMCA ticarət sazişinə sadiq qalmağa davam edir. 

Dünən dərc olunan məlumatlara əsasən, ABŞ əhalisinin gəlirləri 2025-ci ilin iyun ayında əvvəlki ayla müqayisədə 0.3% artıb. Eyni zamanda, xərclərdə də eyni səviyyədə – 0.3% artım qeydə alınıb. Şəxsi Xərclərin Qiymət İndeksi (PCE) iyun ayında aylıq ifadədə 0.3%, illik ifadədə isə 2.6% artıb. Həmçinin, ərzaq və enerji qiymətləri nəzərə alınmadan hesablanan Core PCE indeksi iyun ayında illik ifadədə 2.8% artıb. Aylıq ifadədə göstərici may ayı ilə müqayisədə 0.2%-dən 0.3%-ə yüksəlib.

Eyni zamanda, Almaniyada illik inflyasiya iyul ayının yekunlarına əsasən əvvəlki ayla müqayisədə dəyişməyərək 2% səviyyəsində qalıb. Aylıq ifadədə isə Almaniyada istehlak qiymətlərinin 0.2%-ə qədər artacağı proqnoz olunsa da, göstərici 0.3%-ə yüksəlib. Baza inflyasiya iyun ayı ilə müqayisədə dəyişməyərək 2.7% səviyyəsində qalıb. İyul ayında ölkədə İşsizlik Səviyyəsi 6.3% təşkil edib. Həmçinin, Avrozonada iyun ayında işsizlik 6.2% səviyyəsində açıqlanıb.

Bu gün NFP göstəricisindən əlavə Avrozonada dərc olunacaq İstehlak Qiymətləri İndeksi investorların diqqət mərkəzində olacaq əsas xəbərlərdən biridir. Eləcə də, Almaniyada, Avrozonda və ABŞ-da açıqlanacaq Sənaye Sektorunda Biznes Aktivliyi İndeksi və ABŞ-da dərc olunacaq Orta Saatlıq Əmək Haqqları və İşsizlik Səviyyəsi göstəriciləri bazar iştirakçılarının marağına səbəb olacaq.

Məlumat İnvest-AZ İnvestisiya Şirkətinin analitikləri tərəfindən hazırlanıb.