Avropa Mərkəzi Bankı (AMB və ya European Central Bank (ECB)) Avropa ilə ABŞ arasında ticarətlə bağlı qeyri-müəyyənliyin ortadan qalxacağına ümid edərək, son yeddi iclasında faiz dərəcələrini endirdikdən sonra, iyulun 24-də sabit saxlayıb.

Marja xəbər verir ki, Avropa Mərkəzi Bankı (AMB) depozit faiz dərəcəsini 2 faiz, siyasət faizini 2,15 faiz, gecəlik kreditləşmə faizini isə 2,40 faiz səviyyəsində saxlayıb.

Bloomberg sorğusuna qatılan iqtisadçılar da faiz dərəcələrinin sabit qalacağını gözləyirdilər.

Qərar mətnində, son məlumatların ümumiyyətlə bankın inflyasiya proqnozu ilə bağlı əvvəlki qiymətləndirmələrinə uyğun olduğu bildirilib.

Bank, maaş artımının yavaşlaması ilə Avrozonada qiymət təzyiqlərinin azalmağa davam etdiyini qeyd edib və əlavə edib ki, iqtisadiyyat qismən keçmiş faiz dərəcələrinin azaldılması səbəbindən çətin qlobal mühitdə dayanıqlı qalıb.

Bununla belə, bank qeyd edib ki, mövcud mühit xüsusilə ticarət mübahisələri səbəbindən qeyri-müəyyən olaraq qalır.

ECB ortamüddətli dövrdə inflyasiyanın 2 faizlik hədəfdə sabitləşməsini təmin etmək əzmində olduğunu vurğulayıb və pul siyasəti mövqeyini müəyyən etmək üçün məlumatlara əsaslanan yanaşmasını bir daha təkrarlayıb.

Qərardan sonra ECB sədri Christine Lagarde (Kristin Laqard) mətbuat konfransı üçün kameralar qarşısına keçib.

İqtisadiyyatın dayanıqlılığına diqqət çəkən Kristin Laqard, gömrük rüsumları ilə əlaaqədar olaraq qarşıdakı dövrün qeyri-müəyyən olmasının gözlənildiyini deyib. O, qeyd edib ki, iqtisadi perspektiv üçün risklər aşağı istiqamətdədir.

Avro Bölgəsini və iqtisadiyyatını gücləndirmələri lazım olduğunu bildirən Laqard, ECB-nin daha məhsuldar, rəqabətli və dayanıqlı olması lazım olduğunu deyib.

Laqard inflyasiyanın 2% ətrafında və ECB-nin hazırda yaxşı bir yerdə olduğunu vurğulayıb.

Güclü bir avronun inflyasiyanı gözlənildiyindən daha çox azalda biləcəyini qeyd edən Laqard, qlobal ticarət danışıqlarının gedişatına diqqət etdiklərini, lakin gömrük rüsumlarının və ticarətin yavaşlamasının inflyasiyaya necə təsir edəcəyini bilmədiklərini ifadə edib.

Laqard heç bir məzənnə hədəflərinin olmadığını və iqtisadi proqnozlarda əhəmiyyətli olduğu üçün məzənnələri yaxından izlədiklərini bildirib.