Amerikanın elektrikli avtomobil (elektromobil) istehsalçısı Tesla 2025-ci ilin aprel-iyun dövrü üzrə maliyyə göstəricilərini açıqlayıb.

Marja.az xəbər verir ki, ikinci rübdə şirkətin gəliri illik müqayisədə 12% azalaraq 22,5 milyard dollar olub. Tesla 2024-cü ilin ikinci rübündə 25,5 milyard dollar gəlir əldə etmişdi.

Elektromobil istehsalçısının xalis mənfəəti ikinci rübdə keçən ilin eyni dövrü ilə müqayisədə 16 faiz azalaraq 1,2 milyard dollar təşkil edib. Keçən ilin eyni dövründə Tesla-nın xalis mənfəəti 1,4 milyard dollar olmuşdu.

Şirkətin 2024-cü ilin ikinci rübündə 40 sent olan səhmbaşına qazancı bu ilin eyni dövründə 33 sentə düşüb.

Tesla-nın gəliri və mənfəəti bu ilin ikinci rübündə bazar gözləntilərindən aşağı düşüb.

Tesla 2025-ci ilin ikinci rübündə dünya üzrə 410 min 244 ədəd elektromobil istehsal edib və 384 min 122 ədəd elektromobil satışb. Şirkətin elektromobil istehsalı bu dövrdə illik müqayisədə təxminən dəyişməz qalıb, satdığı elektromobilərin sayı isə 13 faiz azalıb.

Şirkətin açıqlamasında Tesla şirkətin ilk "robotaxi" xidmətinin iyun ayında Ostində istifadəyə verildiyini qeyd edərək, xidmətin əhatə dairəsinin ilkin olaraq məhdud olmasına baxmayaraq, bunun gələcəkdə şirkətin gəlirliliyini artırmağa imkan verəcəyini vurğulanıb.

Açıqlamada daha sərfəli modelin ilk istehsalının iyun ayında həyata keçirildiyi və bu modelin seriyalı istehsalına ilin ikinci yarısında başlanmasının planlaşdırıldığı, “Semi” və “Cybercab” modellərinin isə 2026-cı ildə kütləvi istehsala keçilməsinin gözlənildiyi qeyd edilib.

“Dəyişən gömrük rüsumlarından qaynaqlanan davam edən makroiqtisadi qeyri-müəyyənliklərə, fiskal siyasətdəki dəyişikliklərin qeyri-müəyyən təsirinə və siyasi mühitə baxmayaraq, biz güclü balansımızı qoruyub saxlayırıq. Həmçinin əsas vəsaitlərə, araşdırma və inkişafa yüksək məbləğlərdə investisiyalar etməyə davam edirik”, - deyə məlumatda bildirilir.

Maskın siyasi gedişləri Tesla-ya mənfi təsir edib

Amerikalı milyarder İlon Maska məxsus brend, onun keçən ilki seçkilərdə ABŞ prezidenti Donald Trampı dəstəkləməsi və daha sonra hökumətdə fəal rol alması kimi siyasi hərəkətləri səbəbindən etirazlara və boykotlara məruz qalıb.

Maskın bir vaxtlar rəhbərlik etdiyi Hökumətin Səmərəliliyi Departamenti (DOGE) xərcləri azaltmaq üçün atdığı addımlar və minlərlə federal işçinin işdən çıxarılması ilə bağlı mübahisələrə səbəb olub.

ABŞ-ın müxtəlif yerlərində Tesla avtosalonları qarşısında nümayişlər keçirilib və etirazlar zamanı bəzi insanlar həbs edilib. Tramp Maska dəstəyini göstərmək üçün Tesla avtomobili də alıb.

Mask daha sonra "vergilərin azaldılması" qanun layihəsinin büdcə kəsirini artıracağı ilə bağlı tənqidinə görə Trampla fikir ayrılığına düşüb.

Tramp, "hökumətin təşviqi olmasaydı, Maskın dükanı bağlamalı və Cənubi Afrikaya qayıtmalı olacağını" söyləyib və Maskın şirkətlərinin aldığı subsidiyaların araşdırılması lazım olduğunu bildirib.

Tesla bu il "Möhtəşəm Yeddilik" arasında ən pis nəticə göstərən şirkət kimi diqqət çəkir.