17 iyul 2025 tarixində qlobal iqtisadiyyatın əsas göstəriciləri, İngiltərənin zəif əmək bazarı rəqəmləri və ABŞ-da davam edən istehlak gücü fonunda maliyyə bazarlarında mülayim optimizm müşahidə edildi. Valyuta bazarlarında dolların güclənməsi, əmtəə bazarlarında isə sabitlik əsas tendensiya oldu. Tramp-FED arasında yaşanan gərginlik isə siyasi riskləri bir qədər artırsa da, hazırkı mərhələdə maliyyə bazarlarına ciddi təsir göstərmədi.

Böyük Britaniyada Əmək Bazarı Göstəriciləri – Gözləntilərin Altında Zəif Artım

İngiltərədə 16 iyul tarixində açıqlanan əmək bazarı göstəriciləri, iqtisadiyyatın hələ də zəif toparlandığını ortaya qoydu. İşsizlik səviyyəsi 4.7%-ə yüksəldi (əvvəlki ay: 4.6%), bu isə son 18 ayın ən yüksək göstəricisidir. Həftəlik orta əməkhaqqı artımı isə 5.0% təşkil etdi, lakin bu göstərici əvvəlki ayın (5.4%) altında qaldı.

Bu, rəqəmlər funt sterlinqə təzyiq göstərdi. GBPUSD məzənnəsi gün ərzində 1.33730 hədlərinə qədər gerilədi. 

Avrozonada İstehlak Qiymətləri İndeksi (CPI) – Proqnozlara Uyğun

Avropa Statistika İdarəsi (Eurostat) tərəfindən açıqlanan illik İstehlak Qiymətləri İndeksi (CPI) 2.0% səviyyəsində qalaraq analitik proqnozlarına uyğun gəldi. Əsas CPI isə (enerji və qida qiymətləri xaric) 2.3% təşkil etdi. Bu, Avropa Mərkəzi Bankının inflyasiya hədəfinə yaxınlaşdığını göstərsə də, qiymət sabitliyi baxımından hələ də ehtiyatlılıq tələb edir.

ABŞ-da Açıqlanan İqtisadi Göstəricilər – Sürpriz Güclü İstehlak Gücü

ABŞ-da 16 iyul tarixində açıqlanan pərakəndə satışlar gözləntilərin üzərində artaraq aylıq 0.6% yüksəldi (proqnoz: 0,4%). Bu, istehlakın hələ də dayanıqlı olduğunu göstərir.

Eyni zamanda, sənaye istehsalında 0.3% artım (proqnoz: 0,1%) qeydə alındı. Bu statistik göstəricilər ABŞ iqtisadiyyatının yumşaq eniş ssenarilərinə uyğun inkişaf etdiyini sübut edir.

Tramp və FED Arasında Sərt Polemika Yenidən Alovlandı

ABŞ-da Mərkəzi Bankın (FED) Vaşinqtondakı əsas binasında aparılan restavrasiya işləri ilə bağlı Donald Trampın Twitter/X platformasında etdiyi tənqidlər yeni gərginliyə səbəb oldu. Tramp FED sədri Cerom Pauellin rəhbərliyini "israfçılıq və zaman itkisi" adlandıraraq, gələcəkdə "FED islahatının qaçılmaz olduğunu" bildirib. FED isə yayımladığı açıqlamada binanın təhlükəsizlik və texniki modernləşmə ehtiyacları səbəbilə bu prosesin başladığını bəyan etdi.

Bu gərginlik dolların sabitliyinə qısamüddətli təsir göstərməsə də, bəzi investorlar bu polemikanı FED-in müstəqilliyinə dair narahatlıq kimi qiymətləndirirlər.

Əmtəə Bazarları və Səhm Birjaları

• Brent markalı neft 69.80–70.50 $/barel aralığında ticarət olundu. Tələbə dair zəif proqnozlar və İran-İsrail gərginliyinin səngiməsi qiymətləri sabit saxladı.
   
• Qızılın bir unsiya qiyməti 3348 $ ətrafında dalğalanaraq tarixi zirvələrə yaxın mövqeyini qorudu.

Bu gün Almaniyada açıqlanacaq İstehsal Qiymətləri İndeksi, Amerikada yayımlanacaq tikinti sektoruna dair önəmli iqtisadi statistik rəqəmlər dünya maliyyə bazarlarında ciddi volatilliyə səbəbola bilər.

Məlumat İnvest-AZ İnvestisiya Şirkətinin analitikləri tərəfindən hazırlanıb.