“Azərbaycan Qida Təhlükəsizliyi İnstitutu (AQTİ) publik hüquqi 2024-cü ili 3 milyon 462 min manat xalis mənfəət ilə başa vurub. AQTİ 2023-cü ili 3 milyon 812 min manat xalis mənfəət ilə bağlamışdı.

Marja.az xəbər verir ki, AQTİ-nin əsas əməliyyat gəlirləri 2023-cü ildə 18 milyon 909 min manat ikən, 21 milyon 442 min manata yüksəlib. Sair əməliyyat gəlirləri isə 10 milyon 151 min manatdan 11 milyon 21 min manata qalxıb.

Material, işçi heyyəti üzrə və sair xərcləri daha çox artdığından, AQTİ-nin xalis mənfəəti azalıb.

Azərbaycan Qida Təhlükəsizliyi İnstitutu publik hüquqi Azərbaycan Respublikası Qida Təhlükəsizliyi Agentliyinin strukturuna daxil olmayan tabeliyindəki qurumdur. İnstitutda sahibkarlar, dövlət qurumları və vətəndaşlar üçün müxtəlif istiqamətlərdə xidmətlər göstərilir. Bunlara laborator xidmətlər, təlimlər, məsləhət, qiymətləndirmə və layihələndirmə daxildir. Belə ki, İnstitutun Bakı şəhəri və Abşeron rayonu üzrə 7, regionlarda isə 10 laboratoriyası fəaliyyət göstərir. Həmçinin İnstitutun Mərkəzi Baytarlıq Laboratoriyasının tabeliyində 2+ biotəhlükəsizlik səviyyəsinə uyğun 3 Mobil Səhra Laboratoriyası və 1 Çadır tipli Səyyar Fitosanitar Laboratoriyası var. Bu laboratoriyalar qida təhlükəsizliyi, bitki və heyvan sağlamlığı, eləcə də kompleks tədqiqatlar istiqamətində fəaliyyət göstərir. Laboratoriyalarda müxtəlif qida məhsullarının təhlükəsizlik və keyfiyyət göstəriciləri üzrə müayinələri aparılır. İnstitut tərəfindən təşkil olunan təlimlər HACCP planının hazırlanması, qida məhsullarının izlənilməsi, laboratoriya, təhlükələrin analizi, GMP-Qabaqcıl istehsalat təcrübələri, gigiyena, daşınma və saxlanma qaydaları ilə bağlıdır. Məsləhət və qiymətləndirmə xidmətləri isə ölkə ərazisində qida sahəsində fəaliyyət göstərən müəssisələrin standartları və belə obyektlərin beynəlxalq standartların tələblərinə uyğunlaşdırılması ilə əlaqədardır. Bununla yanaşı, İnstitut tərəfindən respublikamıza qida məhsulları idxal edilən xarici ölkələrdə fəaliyyət göstərən obyektlərin yerində və onlayn qiymətləndirilməsi də aparılır. Müəssisələrin  qida təhlükəsizliyi baxımından Azərbaycan Respublikasının qanunvericiliyinə uyğunluğu yoxlanılır. Nəticələr baxılmaq üçün Azərbaycan Respublikasının Qida Təhlükəsizliyi Agentliyinə təqdim olunur. İnstitut tərəfindən qida sahəsində fəaliyyət göstərən müəssisələrin yerli və beynəlxalq standartların tələblərinə uyğun layihələndirilməsi, eləcə də qida təminatı müəssisələrinin çalışma sahələrinin bölgüsü ilə bağlı işin təşkil edilməsi istiqamətində də işlər görülür.