İranın paytaxtı Tehranda güclü partlayış səsləri eşidilib.

İsrail İrana hücum etdiyini açıqlayıb. İsrailin müdafiə naziri Yisrael Katz İrandan ola biləcək hər hansı cavaba qarşı fövqəladə vəziyyət elan edib. İsrailin baş naziri Benyamin Netanyahu hücumların lazım olduğu qədər davam edəcəyini, ABŞ dövlət katibi Marko Rubio isə ABŞ-ın hücumlarda iştirakının olmadığını bildirib.

İran dövlət televiziyası İsrailin zərbələrində Natanz nüvə obyektinin hədəf alındığını bildirib.

Hücumlar nəticəsində İran İnqilab Keşikçiləri Korpusunun komandanı Hüseyn Səlami həyatını itirib.

Bildirilib ki, Hüseyn Səlami ilə birlikdə İranın Baş Qərargah rəisi də öldürülə bilər.

İranın müxtəlif şəhərlərinə hücumlar təşkil edən İsrailin, Təbriz şəhərini də hədəf aldığı bildirilib.

İran İnqilab Keşikçiləri Qvardiyasına yaxınlığı ilə tanınan "Sepahnews" İsrailin Təbriz şəhərində 5 nöqtəni hədəf aldığını açıqlayıb.

Hücumda itkilər ilə bağlı hələlik rəsmi açıqlama verilməyib.

Netanyahunun bəyanatı

İsrailin baş naziri Benyamin Netanyahu İrana qarşı hücuma keçdiklərini və hücumların “təhlükə aradan qaldırılana qədər” davam edəcəyini bildirib.

Netanyahu, İranın İsrailə qarşı soyqırım ritorikası inkişaf etdirdiyini və bunu nüvə proqramı ilə dəstəklədiyini iddia edib.

Netanyahu İranın uranı atom bombası istehsal edə biləcək qədər zənginləşdirdiyini və silah istehsalı üçün daha əvvəl atmadığı addımlar atdığını iddia edib. Bu sürətlə İranın çox qısa müddətdə nüvə silahı istehsal edə biləcəyini qeyd edən Netanyahu bunun İsrail üçün təhlükə yaratdığını deyib.

İsrail ordusunun bəyanatında deyilir ki, İrana hücumlarda onlarla reaktiv təyyarə iştirak edib.

“İranın müxtəlif bölgələrindəki nüvə hədəfləri də daxil olmaqla, onlarla hərbi obyektə zərbələrin endirilməsini əhatə edən birinci mərhələ başa çatıb”, - deyə məlumatda bildirilir.

ABŞ-dan açıqlama

ABŞ dövlət katibi Marko Rubio İrana hücumda ABŞ-ın əli olmadığını, lakin İsrailin onlara bu hücumun zəruri olduğunu bildirdiyini bildirib.

Rubio deyib ki, İran İsraili hədəfə almamalıdır.

İran dövlət televiziyası İsrailin Tehrana hücumları barədə məlumat yayıb. İlkin məlumatlara görə İsrailin İranın paytaxtı Tehrana hücumları nəticəsində 5 nəfər ölüb, 20 nəfər yaralanıb.

İran lideri Əli Xamenei İsrailin hücumlarında bəzi komandirlərin öldüyünü qeyd edərək, İsrailə sərt cavab verəcəklərini açıqlayıb.

Xamenei, "Bu rejim bilməlidir ki, onu ağır bir cəza gözləyir", deyib.