Dünən ABŞ-da statistik göstəricilərin dərc olunması fonunda dollar major valyutalar qarşısında ucuzlaşıb, qızıl isə cari həftə ərzində itirdiyi dəyəri demək olar ki, yenidən qazanıb. Həmçinin, tarif mövzusu hələ də investorlar üçün prioritet olaraq qalır, çünki ABŞ hazırda bu məsələlərlə bağlı digər ölkələrlə razılaşmalar üzrə danışıqlar aparır. Lakin, bu, gələcək yolun tamamilə rahat olacağı anlamına gəlmir.

Məsələn, ABŞ-la əldə olunmuş razılaşmaya baxmayaraq, Çin hələ də Amerikaya nadir torpaq metallarının ixracını qadağan edir. Bu metallar müdafiə və enerji kimi strateji sahələr üçün həlledici əhəmiyyət daşıyır. Hindistanla da çətinliklər var, çünki görünür, ABŞ prezidenti Donald Tramp  yalnız idxal tariflərinin azaldılması ilə kifayətlənmək istəmir. Tramp, “Apple” şirkətinin baş direktoru Tim Kuka bildirib ki, şirkətin Hindistanda inkişaf etməsini istəmir.

Nəticədə, FED sədri Cerom Pauell, tariflərlə bağlı danışıqlarda mövcud olan bütün çətinlikləri nəzərə alaraq, 15 may, cümə axşamı günü xəbərdarlıq edib ki, “təchizat zəncirində baş verən şoklar” gələcəkdə “daha tez-tez və potensial olaraq daha uzunmüddətli” ola bilər.

Ötən gün 1.11700 səviyyəsinə qədər ucuzlaşan EUR/USD valyuta cütlüyü bugün artım sərgiləyərək səhər saatlarında 1.12180 səviyyəsində ticarət olunub. USD/JPY cütlüyü 148.640 həddindən başlayan eniş tendensiyasını davam etdirir və artıq 144.970 həddinə qədər ucuzlaşıb. Qızılın qiyməti isə 3120$-a qədər gerilədikdən sonra 3252$-a kimi bahalaşıb. 

Cümə axşamı günü Avropa İttifaqının Statistika İdarəsi (Eurostat) tərəfindən açıqlanan məlumatlara əsasən, Avrozonanın ÜDM-i 2025-ci ilin birinci rübündə əvvəlki üç ayla müqayisədə 0.3%, illik ifadədə isə 1.2% artıb. Eləcə də, Avrozonanın Sənaye Sektorunda İstehsal Həcmi mart ayında 2.6% artıb və ekspertlərin 1.9%-lik proqnozunu üstələyib. Böyük Britaniya iqtisadiyyatı isə bu ilin birinci rübündə əvvəlki üç ayla müqayisədə 0.7% böyüyüb. 

ABŞ-da İstehsal Qiymətləri İndeksi (PPI) 2025-ci ilin aprel ayında əvvəlki ayla müqayisədə 0.5% geriləyib. İllik ifadədə PPI 2.4%, PPI Core isə 3.1% artıb. Öləkənin Sənaye Sektorunda İstehsal Həcmi 2025-ci ilin aprel ayında əvvəlki ayla müqayisədə dəyişməyib. İşsizlik Müavinəti üçün Müraciətlərin Sayı isə 229 min olub. Əlavə olaraq, Amerikada Pərakəndə Satış Dövriyyəsinin Həcmi əvvəlki ayla müqayisədə 0.1%, illik ifadədə isə 5.2% artıb. 

ABŞ-ın Filadelfiya Federal Ehtiyatlar Bankının hesabatına əsasən, regionun sənaye sektorunda biznes aktivliyi 2025-ci ilin aprel ayında -4 bəndə qədər yüksəlib, halbuki, mart ayında qeyd olunan göstərici -26.4 bənd idi. Yaponiyanın ÜDM-i isə rüblük ifadədə 0.2%, illik ifadədə isə 0.7% azalıb.

Bugün Avrozonada açıqlanacaq Ticarət Saldosu və ABŞ-da dərc olunacaq Tikintisi Başlanılan Evlərin Sayı göstəriciləri investorların diqqət mərkəzində olacaq xəbərlərdir.

Məlumat İnvest-AZ İnvestisiya Şirkətinin analitikləri tərəfindən hazırlanıb.