Dünən ABŞ-Çin danışıqlarının nəticələrinin müsbət açıqlanması fonunda beynəlxalq birjalarda dollar major valyutalar qarşısında kəskin şəkildə bahalaşdı. Bugün səhər saatlarında isə ABŞ valyutası bir qədər zəifləyib.

EUR/USD valyuta cütlüyü 1.12430 səviyyəsindən 1.10650 səviyyəsinə qədər ucuzlaşdıqdan sonra 1.11190 səviyyəsinə qədər artım sərgiləyib. GBP/USD cütlüyü cari həftənin ilk günü 1.32980 həddindən 1.31390 həddinə qədər zəiflədikdən sonra, bugün 1.32140 həddinə kimi bahalaşıb. USD/JPY cütlüyü isə 3 aprel tarixindən bəri ilk dəfə 148.650 səviyyəsinə qədər yüksəlib.

Dolların bahalaşması qızılın “güvənli liman” maliyyə aləti kimi təzyiq altında qalması ilə nəticələndi. Qiymətli metalın dəyəri 3207$-a qədər endi. Hazırda sarı metal, bir qədər bahalaşaraq, 3258$-a ticarət olunur. “Brent markalı neftin bir barel üçün qiyməti 66$-a qədər yüksəldikdən sonra 64.30$-a kimi ucuzlaşıb. “Bitcoin”-ın qiyməti isə 100000$ səviyyəsinin üzərində möhkəmlənməyə çalışır. Hazırda kapitallaşmasına görə dünyanın ən böyük kriptovalyutasının dəyəri 102560$ təşkil edir.

Bazar ertəsi günü ABŞ və Çin qarşılıqlı şəkildə bir-birlərinin məhsullarına tətbiq olunan əksər gömrük rüsumlarının qüvvədən düşməsi barədə razılığa gəliblər. Bu, dünyanın iki ən böyük iqtisadiyyatı arasında ticarət gərginliyinin azalmasından xəbər verir. 

“Biz 90 günlük fasilə və tarif dərəcələrinin əhəmiyyətli dərəcədə azaldılması barədə razılığa gəldik. Hər iki tərəf qarşılıqlı tariflər üzrə rüsumlarını 115% azaldacaq,” – deyə ABŞ-ın maliyyə naziri Skott Bessent mətbuat konfransında bildirib. Beləliklə, ABŞ Çin mallarına tətbiq etdiyi rüsumları 145%-dən 30%-ə endirəcək, Çin isə ABŞ-dan idxala tətbiq olunan rüsumları 125%-dən 10%-ə endirəcək.

Bugün investorların diqqət mərkəzində ABŞ-da dərc olunacaq İstehlak Qiymətləri İndeksi olacaq. Ekspertlər göstəricinin aylıq ifadədə 0.3%, illik ifadədə isə 2.4% artdığını proqnozlaşdırıblar. Həmçinin, bugün İngiltərə Bankının (BoE) sədri Endryu Beylinin baş tutacaq çıxışı, Almaniyada və Avrozonada dərc olunacaq ZEW iqtisadi indeksləri və Böyük Britaniyada açıqlanacaq əmək bazarı hesabatı bazar iştirakçılarının marağına səbəb olacaq.

Məlumat "İnvest-AZ İnvestisiya Şirkəti"nin analitikləri tərəfindən hazırlanıb.