Dövlət Gömrük Komitəsi Mətbuat və İctimaiyyətlə Əlaqələr İdarəsinin məlumatı:

Mediada “Lion Centre” MMC tərəfindən gətirilən malların gömrük dəyərinin düzgün hesablanmaması, gömrük orqanlarının biznes subyektinə problemlər yaratması, sübut əhəmiyyəti kəsb etməyən sənədlər əsasında cinayət işi qaldırılması barədə həqiqətə uyğun olmayan məlumatlar yayımlanıb.

Dövlət Gömrük Komitəsi bildirir ki, “Lion Centre” MMC-nin ünvanına idxal edilən 5 bəyannamə üzrə malların invoys qiymətləri şübhə doğurduğundan araşdırma aparılıb.

Sənədlərə əsasən qeyd edilən mallara dair invoys qiymətlərinin dəfələrlə azaldılması və nəticədə xeyli miqdarda, cəmi 98 min 191,86 manat məbləğində gömrük ödənişlərinin ödənilməsindən qəsdən yayınılması müəyyən olunub. Fakta görə 17 mart 2025-ci il tarixində Əməliyyat-İstintaq Baş İdarəsində Azərbaycan Respublikası CM-nin 209.1-ci (xeyli miqdarda gömrük ödənişlərinin ödənilməsindən yayınma) maddəsi ilə cinayət işi başlanılıb və istintaqı aparılır.

Cinayət işi ilə əlaqədar bəyannamələri təqdim edən şəxs dəfələrlə Əməliyyat-İstintaq Baş İdarəsinə dəvət olunub, işin xüsusatları, habelə hüquq və vəzifələri ona izah olunmaqla qanunamüvafiq qaydada əlində olan sübutların istintaq orqanına təqdim olunması təklif edilib.

Bütün bunlara baxmayaraq, “Lion Centre” MMC-nin rəhbəri yanlış məlumatlar yayımlamaqla mediadan istintaq orqanına təzyiq vasitəsi kimi istifadə etməyə çalışır.

2024-cü il və 2025-ci ilin ilk 4 ayı ərzində “Lion Centre” MMC adlı sahibkarlıq subyekti gömrük rəsmiləşdirilməsinə 100 ədəd gömrük bəyannaməsi təqdim edib. 100 ədəd gömrük bəyannaməsi üzrə dəyər dürüstləşdirilməsi nəticəsində fərq məbləği 1 532 398 manatdır ki, bu fərqlərin 87%-i bəyannamənin ilkin tərtibatı zamanı sahibkar tərəfindən könüllü surətdə reallaşdırılıb.

“Lion Centre” MMC adına rəsmiləşdirilən hər bir gömrük bəyannaməsi üzrə uyğunsuzluqların aşkar edilməsi və düzgün bəyan etməmə faktları mütəmadi hal alıb. “Lion Centre” MMC tərəfindən əvvəllər də dəfələrlə gömrük qaydalarının pozulması hallarına yol verilib.

Dövlət Gömrük Komitəsi tərəfindən qeyd olunan məsələlərin qanunvericilik aktlarının tələblərini nəzərə alınmaqla hüquqi müstəvidə baxılmasına üstünlük verilir, mediadan və digər üsullardan əsassız təzyiq vasitəsi kimi istifadə olunması yolverilməzdir.