2025-ci ilin Mart ayının sonuna olan məlumata görə, bankların öhdəliklərinin strukturunda ənənəvi olaraq depozit portfeli üstünlük təşkil edir (cəmi öhdəliklərin 77.8%-i və ya 37 milyard 293.1 milyon manatı). Depozit portfelinin 60.5%-i (22 milyard 549 milyon manat) hüquqi şəxslərin, 39.5%-i (14 milyard 744.1 milyon manat) fiziki şəxslərin depozitlərindən (fərdi sahibkarlıqla məşğul olan fiziki şəxslərin depozitləri istisna olmaqla) ibarətdir.

Marja.az xəbər verir ki, bu, Mərkəzi Bankın "Statistik bülleten - Mart 2025" hesabatında bildirilir. 

Fiziki şəxslərin əmanətlərinin 66.4%-i (9 milyard 785.1 milyon manat) milli valyutada, 33.6%-i (4 milyard 959 milyon manat) xarici valyutadadır.

Fiziki şəxslərin əmanət portfelinin 61.1%-i (9 milyard 9.3 milyon manat) müddətli əmanətlərdən ibarətdir. Fiziki şəxslərin müddətli əmanətləri mart ayında 2.3% və ya 204.7 milyon manat artmışdır. Hüquqi şəxslərin tələbli depozitləri 16 milyard 799.2 milyon manat olmaqla, hüquqi şəxslərin cəmi depozit portfelinin 74.5%-ni təşkil etmişdir. 

Fiziki şəxslərin əmanətlərinin dollarlaşması 2025-ci ilin mart ayında ötən ilin müvafiq dövrünə nisbətən 2 faiz bəndi azalaraq 33.1% təşkil etmişdir. 

Xatırladaq ki, 2024-cü ilin yanvar ayının sonunda bankların öhdəliklərinin 81.7%-ini və ya 34 milyard 812.8 milyon manatını depozitlər təşkil etmişdi.  Depozit portfelinin 63%-i (21 milyard 944.3 milyon manat) hüquqi şəxslərin, 37%-i (12 milyard 868.5 milyon manat) fiziki şəxslərin depozitlərindən (fərdi sahibkarlıqla məşğul olan fiziki şəxslərin depozitləri istisna olmaqla) ibarət idi. 

Fiziki şəxslərin əmanət portfelinin 56.2%-i (7 milyard 226.7  milyon manat) müddətli əmanətlərdən ibarət idi. Fiziki şəxslərin əmanətlərinin 64.3%-i (8 milyard 80.4 milyon manat) milli valyutada, 35.7%-i (4 milyard 588.1 milyon  manat) xarici valyutadadır. Hüquqi şəxslərin tələbli depozitləri 17 milyard 84.5 milyon manat olmaqla, hüquqi şəxslərin cəmi depozit portfelinin 77.9%-ni təşkil etmişdi.

Fiziki şəxslərin əmanətlərinin (fərdi sahibkarlıqla məşğul olan fiziki şəxslərin depozitləri daxil olmaqla) dollarlaşması 2024-cü ilin mart ayında əvvəlki ilin müvafiq dövrünə nəzərən isə 3 faiz bəndi azalaraq 35.1% təşkil etmişdi.