Sentyabrın 8-də günün günorta çağı Bakı şəhər İcra Hakimiyyətinin başçısı Hacıbala Abutalıbovun Bakıdakı “26 Lounge & Dining” adlı kafeni bağlatması və əmlakını məhkəmə qərarı olmadan müsadirə etdirməsi biabırçılıq idi.

Ölkəmizdə sahibkarlığın inkişafından, xarici investsiyaların cəlbindən danışdığımız bir dövrdə yüksək vəzifəli bir məmurun bu hərəkəti ölkəmizin imicinə, iş adamlarının inamına böyük zərbə vurdu.

Təbii ki, Azərbaycanın düşmənlərinin, o cümlədən ermənilərin havadarları öz cəsasını almalıdır. Biz hüquqi dövlətdə yaşadığımız üçün, belə araşdırmalar və cəzalar qanunvericiliyin tələblərinə uyğun olmalıdır. Hacıbala Abutalıbovun və ondan asılı bir neçə məmurun sahibkarın obyektinə hücum çəkməsi Azərbaycanın imicinə zərbədir. Tutaq ki, “26 Lounge & Dining” adlı kafenin sahibi erməni havadarı olub. Onu Hacıbala Abutalıbov ifşa etməli deyildi. Bunu üçün ölkənin təhlükəsizlik orqanı var. Hacıbala Abutalıbov öz hərəkəti ilə faktiki olaraq digər dövlət orqanlarının vəzifələrinə məhəl qoymayıb. Kafenin sahibinin erməni havadarı olduğu məhkəmədə sübuta yetirilməli,sonra  kafenin fəliyyətinə xitam verilməli idi.

Biznesdə marketinq siyasəti var. Ola bilər ki, sahibkar “26” adından marketinq və satış məqsədilə istifadə edib. Bu addan istifadə qanunla qadağan edilməyib. Ümumiyyətlə, bəzi adların biznesdə istifadəsinin qadağan olunması mövzusu  dəfələrlə gündəmə gəlib, lakin hüquqi qərar qəbul olunmayıb. Bu gün,  əxlasızlıq yuvası olan “Qarabağ”, “Şuşa” və s. adlı çoxlu kafelər var. Bəlkə də bu məsələ tənzimlənməlidir. İndiki halda “26” adından istifadə qanunla qadağan olunmayıb və “26” adının istfadəsi sahibkarın erməni havadarı olmasına sübut deyil. Həm də, nə üçün “26” adından istifadə edilməməlidir?! Ada qalsa 26 İyun Azərbaycan Silahlı Qüvvələr Günüdür.  

Hacıbala Abutalıbov mətbuata açıqlamasında bildirib ki, lövhədə “Xanımlara 26-lar kafesində qəlyan çəkmək pulsuzdur”  yazısı kafenin əxlaqsızlıq yuvası olduğuna işarədir. Bu qoca məmur bilmir ki, sahibkar bu ifadə ilə müştəri cəlb edir və bu gün bir çox kafelər də bu fənddən istifadə edirlər.

Yəqin ki, sahibkar ilə danışaraq bu adı dəyişdirmək olardı. Nə üçün bu yolun seçilmədiyi gizli olaraq qalır.  

Mən hesab edirəm ki, bu hərəkətinə görə, Hacıbala Abutalıbov cəzalandırılmalıdır.

Bəlkə, Hacıbala Abutalıbov bizim bilmədiyimiz faktları bilə bilər. Ola bilsin ki, o həqiqi milliyətçidir. Bəlkə, merin kim iləsə haqq-hesabı, maraqlar toqquşması olub. Bəlkə də Abutalıbov hansısa şəxsin sifarişini yerinə yetirib. Fərqi yoxdur, edilən bu hərəkət bir merə yarşmayan, investorları xofa salan hərəkət idi. Sabah digər bəhanələr ilə başqa sahibkarlar məhv edilə bilər. Tezliklə, Hacıbala Abutalıbov cəzalandırılmalı, onun qanunsuz hərəkətlər etdiyi ictimaiyyətə bəyan edilməlidir. Onun cəzalandırılması investorların itən inamını bir qədər bərpa edə bilər.

Həmçinin, ölkədə sahibkarlığın inkişafına cavbdeh olan İqtisadiyyat Nazirliyi, şirkət adlarını qeydiyyata alan Vergilər Nazirliyi, reklamlara nəzarət edən Dövlət Reklam Agentliyi də bu məsələyə münasibət bildirməlidir.

Seymur Yunusov, Marja.az