"Ziraat Bank Azərbaycan" Bakı şəhərində yerləşən, sayca 11-ci olan yeni “Neftçilər” filialını müştərilərinin istifadəsinə təqdim edib.

Açılış tədbirində Türkiyə Respublikasının Azərbaycandakı səfiri Prof. Dr. Birol Akgün, Azərbaycan-Türkiyə parlamentlərarası əlaqələr üzrə işçi qrupunun rəhbəri, millət vəkili Əhliman Əmiraslanov, Şimali Kipr Türk Respublikasının Azərbaycan Respublikasındakı nümayəndəsi Ufuk Turqaner, Azərbaycan Respublikasının Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov, Aqrar Kredit və İnkişaf Agentliyinin sədri Yalçın Camalov və Ziraat Bank Azərbaycanın İdarə Heyətinin sədri Dr. Selçuk Demir rəmzi qırmızı lenti kəsərək bankın Bakı şəhəri, Qara Qarayev prospekti 229 ünvanında yerləşən yeni “Neftçilər” filialını rəsmi şəkildə müştərilərin istifadəsinə təqdim ediblər.

"Ziraat Bank Azərbaycan"ın “Neftçilər” filialının açılış tədbirində həmçinin Milli Məclisin deputatı İlham Məmmədov, Azərbaycan Banklar Assosiasiyasının prezidenti Zakir Nuriyev, ATİB, TÜİB və MÜSİAD kimi qeyri-hökumət təşkilatlarının sədrləri, nümayəndələri və bir çox sahibkarlar iştirak ediblər.

"Ziraat Bank Azərbaycan" tərəfindən bildirilib ki, filialın açılmasında əsas məqsəd Nizami rayonu və ətraf ərazilərdə yaşayan hüquqi və fiziki şəxslərə yüksək keyfiyyətli, operativ bank xidmətlərini təqdim etməkdir.

Dünyanın bir çox ölkəsində uğurla fəaliyyət göstərən "Ziraat Maliyyə Qrupu"nun üzvü olan "Ziraat Bank Azərbaycan", beynəlxalq ticarətdə istifadə edilən bank məhsul və xidmətlərini geniş müxbir banklar şəbəkəsi vasitəsilə təqdim etmək imkanına sahibdir. “Bir Bankdan Daha Artıq” şüarı ilə fəaliyyət göstərən bankın yeni “Neftçilər” filialı müasir və funksional infrastruktura malikdir və həftənin 5 günü – saat 09:00-dan 17:00-dək müştərilərin xidmətindədir.

“Ziraat Bank Azərbaycan” ASC, Türkiyə Respublikasına məxsus, 161 illik tarixə malik “Ziraat Maliyyə Qrupu”nun tərkib hissəsidir. Bank, Azərbaycan Respublikasının Mərkəzi Bankı tərəfindən verilmiş 30.12.2014-cü il tarixli 255 nömrəli lisenziya əsasında fəaliyyət göstərir. Korporativ və pərakəndə bankçılıq sahəsində xidmət göstərən bank hazırda Bakı, Gəncə, Sumqayıt və Naxçıvan şəhərlərində yerləşən 11 filialı və Quba şəhərində yerləşən 1 şöbəsi ilə yanaşı, rəqəmsal platformalar üzərindən də müştərilərə xidmət göstərir.