Azərbaycan Mərkəzi Bankı məlumat yayıb.

Məlumatda bildirilir ki, Azərbaycan Respublikası Mərkəzi Bankının İdarə Heyətinin faiz dəhlizinin parametrlərinə dair növbəti qərarı barədə press-reliz 23 aprel 2025-ci il tarixində saat 10:00-da yayımlanacaqdır.

Həmin gün saat 11:00-da Mərkəzi Bankda mətbuat konfransı keçiriləcəkdir.

XXX

Xəbər verdiyimiz kimi, 23 aprel 2025-ci il tarixində Azərbaycan Respublikası Mərkəzi Bankı 2025-ci il üzrə 3-cü faiz qərarını açıqlayacaq. 

Marja.az xəbər verir ki, ardıcıl 7 iclasdır Mərkəzi Bank faizlərini dəyişməz saxlayır. Martın 12-də də Azərbaycan Respublikası Mərkəzi Bankının İdarə Heyətinin qərarı ilə uçot dərəcəsi 7.25%, faiz dəhlizinin aşağı həddi 6.25%, faiz dəhlizinin yuxarı həddi isə 8.25% səviyyəsində dəyişməz saxlanılıb.

Azərbaycan Mərkəzi Bankının illik inflyasiya hədəfi 4±2% (2% - 6%) aralığındadır. Dövlət Statistika Komitəsinin məlumatına görə, Martda illik inflyasiya 5,9% təşkil edib. Bu, inflyasiyanın Mərkəzi Bankın illik inflyasiya hədəf diapazonunin yuxarı sərəhədinə yaxınlaşdığı deməkdir, lakin hədəf diapazonu daxilində qalmaqdadır. Qarşıda yaz və ayları olduğunu nəzərə alsaq, mövsmi amillər ilə əlaqədar olaraq qiymətlərin ümumi səviyyəsi düşəcəkdir. 

"Mövcud pul siyasəti inflyasiyanın hədəf diapazonu daxilində saxlanılmasına və inflyasiya gözləntilərinin sabitləşməsinə yönəlib. Mövcud siyasət çərçivəsində baza ssenari üzrə 2025-ci və 2026-cı ildə illik inflyasiyanın hədəf daxilində (4±2%) olacağı proqnozu dəyişməz qalır.", Mərkəzi Bank 12 Mart 2025-ci il tarixində yaydığı press-relizində bildirmişdi. 

Həmçinin Mərkəzi Bank qeyd etmişdi ki, faiz dəhlizinin parametrləri ilə bağlı növbəti qərarlar faktiki və proqnozlaşdırılan inflyasiya, xarici və daxili risk amillərinin dinamikasından asılı olacaqdır. Mərkəzi Bank bundan sonra da qiymət sabitliyini təmin etmək üçün sərəncamındakı bütün vasitələrdən istifadə edəcəkdir. Faktiki və proqnozlaşdırılan inflyasiyanın azalacağı təqdirdə faiz dəhlizi parametrlərinin azaldılması imkanları nəzərdən keçirilə bilər. Bununla yanaşı, Mərkəzi Bank inflyasiya risklərinin reallaşması halında adekvat reaksiya verəcəkdir.

Mövcud inflyasiya Mərkəzi Bankın hədəf diapazonu daxilində qalmaqda davam etdiyini, qarşıdakı aylarda mövsümi amillər ilə əlaqədar olaraq qiymətlərin ümumi səviyyəsinin düşəcəyini nəzərə alsaq, sabah da Mərkəzi Bankın İdarə Heyətinin faizləri sabit saxlayacağı ehtimali yüksəkdir. 

"Faiz dəhlizi parametrlərinin dəyişdirilməsində pauzanın götürülməsi zərurəti yaranıb"

"Potensial inflyasiya təzyiqləri yarada biləcək qlobal risklərə mövcud geosiyasi gərginlik və ticarət müharibələri fonunda beynəlxalq əmtəə bazarlarında qiymətlərin mümkün dəyişkənliyi aiddir. Yüksək qlobal qeyri-müəyyənlik, xüsusən də bəzi ölkələrdə milli valyutaların məzənnələrindəki dəyişikliklərin və tarif artımlarının inflyasiya proseslərinə təsirlərinin qiymətləndirilməsi üçün faiz dəhlizi parametrlərinin dəyişdirilməsində pauzanın götürülməsi zərurəti yaranır.", - Mərkəzi Bank 12 Mart 2025-ci il tarixində yaydığı press-relizində bildirmişdi.