"AFB Bank" ASC 2025-ci ilin 1-ci rübünü (yanvar - mart) 2 milyon 322 min manat xalis mənfəət ilə başa vurub. Bank 2024-cü ilin 1-ci rübünü 458 min manat xalis zərər ilə bağlamışdı. 

Marja.az xəbər verir ki, "AFB Bank"ın cəmi əməliyyat gəlirləri (faiz və qeyri-faiz gəlirləri) 2024-cü ilin ilk rübündə 8 milyon 90 min manat ikən, 2025-ci ilin ilk rübündə 7 milyon 835 min manat təşkil edib (255 min manat və ya 3,2% azalıb).

"AFB Bank"ın cəmi əməliyyat xərcləri (faiz və qeyri-faiz xərcləri) 2024-cü ilin ilk rübündə 5 milyon 668 min manat ikən, 2025-ci ilin ilk rübündə 6 milyon 747 min manat təşkil edib (1 milyon 79 min manat və ya 19% artıb). 

Göründüyü kimi, 2025-ci ilin ilk rübündə "AFB Bank"ın əməliyyat gəlirlərinin 255 min manat azalmasına qarşılıq, əməliyyat xərcləri 1 milyon 79 min manat artıb. 

2025-ci ilin 1-ci rübündə 1 milyon 88 min manat əməliyyat mənfəətindən əlavə, mümkün zərərlər üçün yaradılan məqsədli ehtiyatlardan azad olan 1 milyon 234 min manatı mənfəətə əlavə edilib və "AFB Bank" ilk rübü 2 milyon 322 min manat xalis mənfəət ilə bağlayıb. Mümkün zərərlər üçün yaradılan məqsədli ehtiyatlardan vəsaitin qayıtması Bankın gözlədiyi zərərin azaldığına işarədir. 

Müqayisə üçün qeyd edək ki, 2024-cü ilin ilk rübündə "AFB Bank" 2 milyon 422 min manat əməliyyat mənfəəti əldə etməsinə baxmayaraq, 2 milyon 879 min manat mümkün zərərlər üçün yaradılan məqsədli ehtiyatlara ayırdığı üçün həmin dövürü 458 min manat zərər ilə bağlamışdı. 

BANK BÖYÜYÜB

2024-cü ilin sonu ilə müqayisədə 2025-ci ilin ilk rübündə "AFB Bank"ın cəmi aktivləri 4 milyon 417 min manat artaraq 31 mart 2025-ci il tarixində 299 milyon 585 min manata çatıb. O cümlədən Bankın kredit portfeli 3 milyon 749,6 min manat artaraq 186 milyon 841 min manata yükəlib.

2024-cü ilin sonu ilə müqayisədə "AFB Bank"ın istehlak kreditləri portfeli 1 milyon 250 min manat artaraq 23 milyon 13 min manata, biznes kreditləri portfeli 3 milyon 876 min manat artaraq 93 milyon 932 min manata qalxıb, ipoteka kreditləri portfeli isə 1 milyon 377 min manat azalaraq 69 milyon 896 min manata düşüb. 

İlk rübdə "AFB Bank"da hüquqi şəxslərin (şirkətlərin) depozitləri 8 milyon 712 min manat artaraq 31 mart 2025-ci il tarixində 81 milyon 587 min manat təşkil edib.

31 mart 2025-ci il tarixində "AFB Bank" 77 milyon 409 min manat məcmu kapitala malik olub.