Tariflərin (gömrük rüsumlarının) qlobal iqtisadiyyata təsiri ilə bağlı artan narahatlıqlar fonunda investorlar təhlükəsiz "sığınacaqlara" axın etdikcə qızılın qiyməti bir unsiya üçün 3200 dolları keçərək rekord həddə çatıb.

Marja.az xəbər verir ki, cümə günü erkən Asiya ticarətində külçə qızıl 1,4 faiz də bahalaşaraq 3219,48 dollara çatıb. Qızıl son 2 gündə 3%-dən çox dəyər qazanıb.

Qızılın "təhlükəsiz sığınacaq" xüsusiyyəti bu həftə də gündəmə gəlib. Bu bahalaşma əsasən ABŞ Prezidenti Donald Trampın tarifləri (gömrük rüsumları) ilə əlaqədardır. Qeyri-müəyyənlik və risklər davam edir, Trampın onlarla ticarət tərəfdaşı ölkə üçün daha yüksək tariflərə 90 günlük fasilə elan etməsinə baxmayaraq, Çindən idxal üzrə tariflər ən azı 145%-ə yüksələcək.

Analitiklər bildirirb: “Görünməmiş ticarət gərginliyi ABŞ dollarına inamsızlığı və təhlükəsiz aktivlərə tələbi artırdığından, hazırda qızıl bazarda ən yaxşı aktivdir”.

Ağ Evin İqtisadi Şurasının direktoru Kevin Hassett, ABŞ-ın iqtisadi tərəfdaşları ilə danışıqlarda "yaxşı irəliləyiş" əldə etdiyini, lakin 90 günlük müddət bitmədən ticarət razılaşmasının əldə olunacağına şübhələrin artdığını söyləyib. 

Mərkəzi bankların alışları və ABŞ Federal Ehtiyat Sisteminin daha da monetar yumşaltma tətbiq edəcəyinə dair gözləntilər də qızılın bu il 20 faizdən çox artmasına təkan verib. Cümə axşamı açıqlanan məlumatlar ABŞ-da əsas inflyasiyanın mart ayında geniş şəkildə "soyuduğunu" göstərib. Bu məlumatlardan sonra qlobal bazarlar ilin sonuna qədər üç faiz endirimi gözləməyə başlayıblar; Dördüncü endirim ehtimalı da masadadır. Aşağı faiz dərəcəsi mühiti ümumiyyətlə faiz gətirməyən qızılı dəstəkləyir.

Qızılın həftəlik bahalaşması təxminən 6 faizə çatıb. Bloomberg Dollar Spot İndeksi ardıcıl dördüncü gündür ki, ucuzlaşıb. Gümüş bir qədər ucuzlaşıb, platin və palladium isə bir qədər bahalaşıb.