Çindən yeni dollar qərarı

Çindən yeni dollar qərarı

Reuters agentliyinin məlumatına görə, Çin Xalq Bankı (Mərkəzi Bank) dövlət banklarından dollar alışını azaltmağı xahiş edib. Həmçinin, Böyük banklara müştəriləri üçün dollar alış sifarişlərini yerinə yetirərkən nəzarəti gücləndirmələri tövsiyə olunub. Məlumata görə, Çinin mərkəzi bankı yuanın kəskin ucuzlaşmasına imkan verməyəcək.

Çin Xalq Bankı (PBOC, mərkəzi bank) böyük dövlət banklarından ABŞ dolları alışlarını azaltmağı xahiş edib.

Marja xəbər verir ki, bu barədə "Reuters" agentliyi məsələ ilə bağlı bilavasitə məlumatı olan insanlara istinadən məlumat yayıb.

PBOC bu həftə dövlət banklarına təlimat göndərərək, onlardan şəxsi hesabları üçün ABŞ dolları almağı azaltmağı xahiş edib.

Həmçinin, böyük banklara müştəriləri üçün dollar alışı sifarişlərini yerinə yetirərkən nəzarəti artırmaq tövsiyə edilib. Mənbələrdən biri qeyd edib ki, mərkəzi bank spekulyativ ticarəti cilovlamaq istəyir.

Bu göstəriş, ABŞ-ın Çin ixracatına tətbiq etdiyi kütləvi tariflərdən və Pekinin cavab addımlarından sonra yuanın ağır eniş təzyiqi ilə üzləşdiyi bir vaxtda verilib.

Böyük dövlət bankları yuanın ucuzlaşmasını yavaşlatmaq üçün çərşənbə günü "onshore" bazarında aqressiv şəkildə dollar satıb, yuan alıblar.

Məlumata görə, PBOC, tariflərin ixraca və daha geniş iqtisadiyyata təsirini yumşaltmaq üçün yuanın kəskin devalvasiyasına əl atmayacaq.

Çinin yuanı bu ay indiyə qədər təxminən 1,3% dəyər itirib və çərşənbə günü bir dollar üçün 7,35 səviyyəsində olub. Ofşordakı yuan isə bir gecədə rekord minimuma çatıb.

"Çinin mərkəzi bankı ixraca və geniş iqtisadiyyata tətbiq edilən tariflərdən gələn zərbəni yumşaltmaq üçün yuanın devalvasiyasına əl atmayacaq",- üç siyasət müşaviri və mərkəzi bankın düşüncələri ilə tanış olan başqa bir bankir "Reuters" agentliyinə bildiriblər.

“Kəskin ucuzlaşma baş verməyəcək, çünki bu, bazarın inamına zərbə vura bilər, lakin cüzi ucuzlaşma ixraca kömək edəcək”, - siyasət məsləhətçilərindən biri bildirib.

"Biz həmçinin subsidiyalar, vergi güzəştləri və ya bazarın diversifikasiyası vasitəsilə əsas müəssisələrə kömək etməliyik", -mənbələrdən biri əlavə edib.

09.04.2025 13:30

📲 İndi
Marja.az-ın WhatsApp kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az