Bakıda Cənub Qaz Dəhlizi və Yaşıl Enerji Məşvərət şuralarının iclasları çərçivəsində “Azərbaycan Respublikasının Energetika Nazirliyi, Qazaxıstan Respublikasının Energetika Nazirliyi, Özbəkistan Respublikasının Energetika Nazirliyi ilə Asiya İnkişaf Bankı və Asiya İnfrastruktur İnvestisiya Bankı arasında Anlaşma Memorandumu”nun imzalanması mərasimi olub.

Azərbaycan, Qazaxıstan, Özbəkistanın energetika nazirləri tərəfindən imzalanmış sənədə AİB və AİİB-nin təmsilçiləri də qoşulub.

Bu memorandum Azərbaycan, Qazaxıstan və Özbəkistan arasında “Xəzər Yaşıl Enerji Dəhlizi” layihəsinin texniki-iqtisadi əsaslandırmasının (TİƏ) birinci mərhələsini dəstəkləmək məqsədilə əməkdaşlığı nəzərdə tutur. 

Azərbaycanın energetika naziri Pərviz Şahbazov deyib: “Azərbaycan, Özbəkistan və Qazaxıstanın enerji sistemlərinin birləşdirilməsi strateji və tarixi əhəmiyyətli layihədir. “Xəzər Yaşıl Enerji Dəhlizi” təşəbbüsümüzə AİB və AİİB-in qoşulması layihənin icrasında mühüm irəliləyişlərdən biridir. Birgə əməkdaşlığımız layihənin texniki-iqtisadi tədqiqatlarına tezliklə başlamağımızı təmin edəcək. Bu regional yaşıl enerji təşəbbüsü sayəsində Azərbaycanla Mərkəzi Asiya ilk trans-Xəzər enerji dəhlizini reallaşdırmış olacaq.”

Qazaxıstanın energetika naziri Erlan Kudaybergenoviç Akkenjenov deyib: "Yaşıl dəhliz" layihəsi kimi birgə təşəbbüslər regionun enerji sistemlərini gücləndirmək, yaşıl texnologiyaları təşviq etmək və ekoloji təmiz elektrik enerjisinin davamlı ixracını təmin etmək əzmimizi nümayiş etdirir. Birlikdə biz enerjinin təkcə bir resurs deyil, həm də davamlı inkişaf və sabitliyin təməli olduğu bir gələcək yaradırıq".

Özbəkistanın energetika naziri Jurabek Mirzamahmudov deyib: “Qazaxıstan, Özbəkistan və Azərbaycan arasında yaradılacaq Yaşıl Enerji Dəhlizi Mərkəzi Asiyanın bərpa olunan enerji potensialını Avropa ilə birləşdirən etibarlı və dayanıqlı körpüyə çevirən mühüm əməkdaşlıq nümunəsidir. Bu layihə yaşıl gələcək qurmaq, iqtisadi artımı təşviq etmək və uzunmüddətli enerji təhlükəsizliyini təmin etmək istiqamətindəki öhdəliyimizi əks etdirir.”

AİB-in Mərkəzi və Qərbi Asiya Departamentinin Baş direktoru Yevgeni Jukov deyib: “Xəzər Yaşıl Enerji Dəhlizi təşəbbüsü üç ölkə və AİB üçün strateji prioritetdir. Bu təşəbbüs çoxsaylı regional problemlərin həlli ilə yanaşı, təmiz enerji infrastrukturu sahəsində transsərhəd əməkdaşlığın inkişafı üzrə missiyamızın həyata keçirilməsinə birbaşa töhfə verir. Memorandumun imzalanması, Azərbaycan, Qazaxıstan və Özbəkistan, eləcə də Asiya İnkişaf Bankı və Asiya İnfrastruktur İnvestisiya Bankı arasında əməkdaşlıq əlaqələrimizdə həlledici bir mərhələdir. Bu mövcud yanaşmamızı transformativ bir regional təşəbbüsə çevirmək üçün kollektiv öhdəliyimizi əks etdirir.”

AİİB-in nümayəndəsi Hong Vey deyib: “Asiya İnkişaf İnvestisiya Bankı “Xəzər Yaşıl Enerji Dəhlizi” layihəsinin texniki-iqtisadi əsaslandırmasının hazırlanmasında Azərbaycan, Qazaxıstan, Özbəkistan hökumətləri və Asiya İnkişaf Bankı ilə əməkdaşlıqdan məmnundur. Bu layihə Mərkəzi Asiyanın böyük təmiz enerji potensialının üzə çıxmasına imkan verəcək, Azərbaycan isə Mərkəzi Asiyadan Avropaya təmiz enerji axını üçün bir qapı kimi mühüm rol oynayacaq”.

Xatırladaq ki, “Azərbaycan Respublikası, Qazaxıstan Respublikası və Özbəkistan Respublikası hökumətləri arasında yaşıl enerjinin inkişafı və ötürülməsi sahəsində strateji tərəfdaşlıq haqqında Saziş” dövlət başçıları tərəfindən 2024-cü ilin 13 noyabrında COP29 çərçivəsində imzalanıb.