Lənkəran Şəhər İcra Hakimiyyətinin başçısına sui-qəsd hazırlamaqda ittiham olunan Bəhruz Əskərovun cinayət işi üzrə məhkəmənin növbəti prosesi keçirilib.

Bakı Ağır Cinayətlər Məhkəməsində hakim Səbuhi Hüseynovun sədrliyi ilə keçirilən prosesdə ilk dəfə zərərçəkən Taleh Qaraşovun vəkili iştirak edib.

Vəkil Taleh İbrahimov bildirib ki, təqsirləndirlən şəxsə qarşı maddi tələbləri olmasa da, şikayətçidirlər və onun qanunvericiliyə uyğun cəza almasını istəyirlər.

Daha sonra zərərçəkən şəxsin ibtidai istintaqa verdiyi ifadəsi elan olunub.

Taleh Qaraşov ifadəsində qeyd edib ki, təqsirləndirilən şəxsi tanımır: “Mənim həyatıma sui-qəsd hazırlandığını mətbuatdan öyrənmişəm və Bəhruz Əskərovu tanımıram. Məsələdən narahat oldum. Həyatım üçün təhlükənin olduğunu, izləndiyimi hiss etməmişəm”.

İş üzrə 3 nəfər şahid qismində tanınır və həmin şəxslərdən biri hazırda həbsdədir.

Növbəti məhkəmə digər iki şahidin ifadəsi ilə davam edəcək.

Məhkəmə prosesi aprelin 29-da davam etdiriləcək.

Xatırladaq ki, DTX tərəfindən cinayət məsuliyyətinə cəlb olunan B.Əskərova qarşı Cinayət Məcəlləsinin 28,120.2.1, 28,120.2.10, 28,120.2.11, 28,120.2.12 (qabaqcadan əlbir olan bir qrup şəxs halında milli, irqi, dini ədavət və düşmənçilik zəminində təkrar adam öldürməyə hazırlıq), 28,214.2.1, 28,214.2.3 (odlu silahdan və silah qismində istifadə olunan predmetlərdən istifadə etməklə terror aktı törətməyə hazırlıq), 28,214-3.1 (terrorçuluqla əlaqədar təlim keçməyə hazırlıq), 28,277 (dövlət xadiminin həyatına sui-qəsd etməyə hazırlıq) və 28,278.1-ci (dövlətin konstitusiya quruluşunun zorla dəyişdirilməsinə yönələn hazırlıq hərəkətləri) maddələri ilə ittiham irəli sürülüb.

Qeyd edək ki, Bəhruz Əskərov respublikanın müxtəlif rayonlarında yaşayan şəxsləri gizli əlaqəyə cəlb edərək, onlara Lənkəran Şəhər İcra Hakimiyyətinin başçısının həyatına sui-qəsdin təşkil olunması barədə tapşırıqlar verməkdə ittiham olunur.

Həmçinin Bəhruz Əskərovun əlaqəsində olan şəxslərə Azərbaycanın bəzi rayonlarında fərdi qaydada ingilis dili müəllimi kimi fəaliyyət göstərən xarici ölkə vətəndaşına qarşı sui-qəsd həyata keçirməyi tapşırması da təsbit edilib.

Dövlət Təhlükəsizliyi Xidməti tərəfindən keçirilmiş kompleks əməliyyat-istintaq tədbirləri nəticəsində Bəhruz Əskərovun tutularaq Azərbaycan Respublikasında cinayət məsuliyyətinə cəlb edilməsi təmin olunub, məhkəmənin qərarı ilə barəsində həbs qətimkan tədbiri seçilib.

© APA