ABŞ fond bazarı bu ilin ən pis gününü yaşayıb. Ən böyük itki texnologiya sektorunda baş verib. NASDAQ 100 indeksinə daxil olan şirkətlərin ümumi bazar kapitallaşması bir gündə 1 trilyon dollar azalıb.

Marja xəbər verir ki, ABŞ prezidenti Donald Tramp ölkədə tənəzzül risklərini istisna etmədikdən sonra ABŞ səhmləri ucuzlaşıb.

Donald Tramp "Fox News"a müsahibəsində, idxal tariflərinin (gömrük rüsumlarının) qüvvəyə minməsi ilə Amerika iqtisadiyyatının "keçid dövründən" keçdiyini söyləyib. "2025-ci ildə ABŞ-da tənəzzülü gözləyirsinizmi" sualına Tramp belə cavab verib: “Mən bu proqnozları verməkdən nifrət edirəm. Bu, keçid dövrüdür, çünki gördüyümüz işlər çox vacibdir. Biz Amerikaya sərvət gətiririk. Bu vacibdir”. O əlavə edib ki, amerikalıların onun siyasətinin nəticələrini görməsi üçün müəyyən vaxt lazım olacaq.

Nasdaq 100 indeksi 3,8% azalaraq 19 425,8 bənd təşkil edib;

Dow Jones indeksi 1,9% azalaraq 41 978,6 bənd təşkil edib;

S&P 500 indeksi 2,8% azalaraq 5610,2 bənd olub.

Tez-tez Wall Street-in "qorxu indeksi" adlandırılan VIX İndeksi (VIX) 3,6 bənd artaraq 27-yə yüksəlib. Reuters-in hesablamalarına görə, bu, dekabrın 18-dən bəri ən yüksək göstəricidir .

S&P 500 səhmləri arasında enişin liderləri elektrik avtomobil istehsalçısı Tesla (-14%) və proqram təminatı istehsalçısı Palantir Technologies-in (-11%) səhmləri olub. Apple səhmləri 5,3%, Microsoft səhmləri 3,5%, NVIDIA səhmləri isə 4,8% dəyər itirib.

Bloomberg yazır ki, ABŞ fond bazarı investorları qorxurlar ki, ABŞ prezidenti Donald Tramp tariflər və hökumətin miqyasını azaltmaq kimi uzunmüddətli hədəflərinə çatmaq üçün iqtisadi və bazar çətinliklərinə dözməyə hazırdır.

Analitiklər qeyd edib ki, potensial geosiyasi qarışıqlığa əlavə olaraq inflyasiya, zəif iqtisadi artım və hazırda ticarət müharibələri ilə daha da şiddətlənən ABŞ-ın potensial tənəzzülü barədə davam edən narahatlıqlar var. Prezident Tramp cari siyasətlərinin iqtisadi artımı ləngitməsi ehtimalını etiraf edib və bu, bazar əhval-ruhiyyəsinə mənfi təsir edir.

ABŞ Prezidenti Donald Trampın Kanada, Meksika və Çin kimi ticarət tərəfdaşlarından idxal olunan mallara tətbiq etdiyi tariflər iqtisadi artımın yavaşlaması və bazarların aşağı düşməsi ilə bağlı narahatlıqları artırdığı üçün Wall Street analitikləri 2025-ci ildə S&P 500 indeksi ilə bağlı optimist proqnozlarını yenidən nəzərdən keçirməyə başlayıblar.