Fevralda qlobal ərzaq qiymətləri 1,6 faiz artıb

Fevralda qlobal ərzaq qiymətləri 1,6 faiz artıb

Birləşmiş Millətlər Təşkilatının Ərzaq və Kənd Təsərrüfatı Təşkilatı (FAO) bildirib ki, qlobal ərzaq qiymətləri fevral ayında şəkər, bitki yağları və süd məhsullarının qiymətlərindəki artımların təsiri ilə əvvəlki ayla müqayisədə 1,6 faiz artıb.

Marja.az FAO-nun yaydığı açıqlamaya istinadən xəbər verir ki, ərzaq məhsullarının beynəlxalq qiymətlərində aylıq dəyişiklikləri izləyən FAO-nun Ərzaq Qiymətləri İndeksi fevralda yanvar ayı ilə müqayisədə 1,6 faiz artaraq orta hesabla 127,1 bənd təşkil edib. Ötən ilin fevral ayı ilə müqayisədə artım tempi 8,2 faiz təşkil edib.

Qlobal ərzaq qiymətlərinin süd məhsulları, şəkər və bitki yağları hesabına artması diqqət çəkib.

Taxıl Qiymətləri İndeksi buğda və qarğıdalı qiymətlərinin artması ilə aylıq 0,7 faiz artıb və illik 1,1 faiz azalıb. Artım Rusiyadan təklifin məhdudlaşması, Şərqi Avropa və Şimali Amerikada məhsul şəraiti ilə bağlı narahatlıqlar səbəbindən buğda qiymətlərinin yüksəlməsi ilə bağlı olub. Dünya qarğıdalı qiymətləri Braziliyadan təklifin azalması və ABŞ-ın güclü ixrac tələbi ilə dəstəklənib. Dünya düyü qiymətləri isə fevral ayında 6,8% azalıb.

Bitki Yağı Qiyməti İndeksi, Cənub-Şərqi Asiyada mövsümi tədarük məhdudiyyətləri və biodizel sektorundan güclü tələb səbəbiylə palma, soya və günəbaxan yağlarının yüksək qiymətləri ilə əlaqədar olaraq aylıq müqayisədə 2 faiz artıb. İndeksdə illik artım 29,1 faiz olub.

Əsas ixracatçılar - Hindistan və Braziliyada mənfi istehsal gözləntiləri səbəbiylə Şəkər Qiyməti İndeksi əvvəlki ayla müqayisədə 6,6% artıb.

FAO Süd Qiyməti İndeksi güclü qlobal tələbin nəticəsi olaraq 4 faiz artarkən, Ət Qiyməti İndeksi isə 0,1 faiz azalıb.

07.03.2025 15:06

📲 İndi
Marja.az-ın WhatsApp kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az