AÇG-də yeni layihə üzrə hasilat quyusunun qazılması işləri bitmək üzrədir

AÇG-də yeni layihə üzrə hasilat quyusunun qazılması işləri bitmək üzrədir

"Azəri-Çıraq-Günəşli" yataqlar blokunda (AÇG) sərbəst qazın işlənməsi layihəsi çərçivəsində iki prioritet laydan qaz hasil etmək məqsədilə ilkin quyuda tamamlanma işlərinin bu ilin ortalarında bitməsi gözlənilir.

Bunu jurnalistlərə açıqlamasında"BP-Azerbaijan" şirkətinin mətbuat xidmətinin rəhbəri Tamam Bayatlı deyib.

VTB-də minimal faiz dərəcəsi ilə nağd kredit 10.49%-dən

"Qazma işləri bitmə üzrədir, gözləyirik ki, haradasa bu ilin ortalarında biz quyuda tamamlama işləri aparaq", - Tamam Bayatlı qeyd edib.

O əlavə edib ki, bu quyu olduqca əhəmiyyətlidir, çünki o, hasilat vasitəsilə qiymətləndirmə aparmağa da imkan verəcək ki, bunun əsasında da gələcək işlənmə planlarını qurmaq mümkün olacaq. Quyu mövcud "Qərbi Çıraq" platformasında qazılır.

"Biz AÇG-də dərin paylardan olan ilk qazı bu ilin sonuna gözləyirik", - Tamam Bayatlı vurğulayıb.

Qeyd edək ki, quyu qazılıb tamamlandıqdan sonra burada qazın hasilatına dərhal başlanacaq. Quyu "Qərbi Azəri" platformasından gedən mövcud qaz sisteminə qoşulmalıdır ki, quyudan "mavi yanacaq" Səngəçal terminalına nəqli mümkün olsun.Bunun üçün də platformada böyük həcmdə avadanlıq quraşdırılmalıdır və hazırda bu istiqamətdə işlər aparılır. Qeyd olunan quraşdırma işləri platformanın dayandırılmasını tələb eləmir.

Xatırladaq ki, AÇG yatağındakı sərbəst təbii qaz (STQ) ehtiyatlarının kəşfiyyatı, qiymətləndirilməsi, işlənməsi və hasilatı ilə bağlı işləri irəlilətmək məqsədilə 20 sentyabr 2024-cü il tarixində AÇG üzrə mövcud hasilatın pay bölgüsü sazişinə (HPBS) yeni bir əlavə imzalanıb. AÇG yatağının STQ ehtiyatlarının xeyli iri həcmdə - 4 trilyon kub futadək olduğu düşünülür.

Bu sənədə uyğun olaraq, SOCAR və AÇG tərəfdaşları hazırda STQ laylarının işlənməsi üçün növbəti fəaliyyətləri planlaşdırırlar. Bu işlərin bir hissəsi kimi hazırda iki prioritet laydan qaz hasil etmək məqsədilə ilkin quyu qazılır.

05.03.2025 17:36