Ötən gün ABŞ-da proqnozların üzərində dərc olunan inflyasiya göstəriciləri fonunda dollar avro və funt sterlinq qarşısında kəskin bahalaşdı.

Belə ki, EUR/USD valyuta cütlüyü 1.04880 səviyyəsindən 1.03800 səviyyəsinə qədər geriləyib, GBP/USD cütlüyü isə eyni dövr ərzində 1.26870 səviyyəsindən 1.25800 səviyyəsinədək ucuzlaşıb.

Dolların güclənməsi qızılın qiyməti mənfi təsir edib. Dəyərli metal bugün səhər 2857$ həddini aşağıya doğru test edib. Neftin qiymətində keçən həftə başlayan eniş tendensiyası səngiyib və “Brent” markalı neftin bir barrel üçün dəyəri 74$-a qədər yüksəlib.

ABŞ-ın Ticarət Departamentinin təqdim etdiyi yenilənmiş məlumatlara əsasən, ölkə iqtisadiyyatı 2024-cü ilin dördüncü rübündə illik ifadədə 2.3% böyüyüb. Beləliklə, iqtisadi artım tempinin proqnozu daha əvvəl açıqlanan səviyyədə dəyişməz olaraq qalıb. Amerika iqtisadiyyatının üçdə ikisini təşkil edən istehlak xərcləri oktyabr-dekabr aylarında 4.2% (düzəliş edilməmiş) artıb ki, bu da 2023-cü ilin birinci rübündən bəri ən böyük artımdır.

Eləcə də, dördüncü rübdə ixrac 0.5%, idxal 1.2% azalıb, şəxsi xərclərin qiymət indeksi (PCE) isə əvvəlki üç ayla müqayisədə 2.4% artıb. Federal Ehtiyatlar Sisteminin inflyasiya risklərini qiymətləndirərkən yaxından izlədiyi (PCE Core) indeksi (ərzaq və enerji istisna olmaqla şəxsi xərclərdəki dəyişiklik) 2.5%-dən 2.7%-ə qədər artıb. Dördüncü rüb üçün yekun məlumatın martın 27-də açıqlanması planlaşdırılır.

ABŞ-da Uzunmüddətli İstifadə Məhsulları üzrə Sifarişlərin Həcmi yanvar ayında 3.1% artıb. Müqaisə üçün qeyd edək ki, dekabr ayında göstərici 1.8% azalmışdı. Həmçinin, işsizlik müavinəti üçün müraciət edənlərin sayı 242 min nəfərə qədər artıb, ölkənin Təkrar Mənzil Bazarında Tamamlanmamış Satış Əməliyyatların İndeksi isə -4.6% təşkil edib. 

Bugün Almaniyada açıqlanacaq İstehlak Qiymətləri İndeksi investorların diqqət mərkəzində olacaq əsas xəbərlərdən biridir. Əlavə olaraq, Almaniyada açıqlanacaq İşsizlik Səviyyəsi və Pərakəndə Satış Dövriyyəsinin Həcmi, Kanadada dərc olunacaq ÜDM və ABŞ-da açıqlanacaq Ticarət Saldosu və Şəxsi Xərclərin Qiymət İndeksi göstəriciləri bazar iştirakçılarının marağına səbəb olacaq.

Məlumat İnvest-AZ İnvestisiya Şirkətinin analitikləri tərəfindən hazırlanıb.