Almaniyanın mühafizəkarları milli seçkilərdə qalib gəldikdən sonra Avronun məzənnəsi son bir ayın ən yüksək səviyyəsinə qalxıb və birja fyuçersləri də gözlənildiyi kimi yüksəlib.

Marja xəbər verir ki, investorlar böyük ehtiyac olan fiskal islahatların həyata keçirilib-keçirilməyəcəyini görmək üçün yekun seçki nəticələrini gözləyirlər.

Almaniyanın Federal Seçki Komissiyasının saytında verilən məlumata görə, Fevralın 23-də keçirilən növbədənkənar Bundestaq seçkilərində mühafizəkar Xristian Demokrat İttifaqı/Xristian Sosial Birlik (CDU/CSU) bloku 28,6% səs toplayaraq qalib gəlib. Almaniya üçün Alternativ (AfD) 2021-ci il seçkiləri ilə müqayisədə səs payını iki dəfə artıraraq 20,8% toplayıb və tarixində ilk dəfə ikinci olub. Üçüncü yerdə kansler Olaf Şoltsun Almaniya Sosial Demokrat Partiyası qərarlaşıb. Onu seçicilərin 16,4%-i, yəni 2021-ci ildəkindən üçdə bir dəfə az adam dəstəkləyib. Bu, Sosial Demokratlar üçün partiyanın tarixində ən pis nəticədir. Daha sonra Yaşıllar və Sol Partiyası gəlir. Onlar müvafiq olaraq 11,6% və 8,8% səs toplayıblar.

Mühafizəkarların lideri Fridrix Merzin Almaniyanın növbəti kansleri olacağı gözlənilsə də, koalisiya danışıqlarının mürəkkəb olduğu və uzun müddət davam edə biləcəyi bildirilir. Lakin investorlar seçkinin nəticələrində heç bir böyük sürprizin olmamasından məmnundurlar.

Avro və fond bazarları yüksəlişdədir

Avro 1,05245 dollara kimi bahalaşaraq bir ayın ən yüksək səviyyəsini görüb. Bakı vaxtı ilə saat 08:35-də Avro/Dollar məzənnəsi 0,6% artımla 1,0514 səviyyəsində olub. Avropa fond bazarları da sabitləşib, EUROSTOXX 50 fyuçersləri 0,46 faiz, Almaniyanın DAX fyuçersləri isə 1,12 faiz möhkəm bahalaşıb. Almaniyanın 10 illik istiqrazlarının gəlirliliyi bir qədər aşağı düşüb.

"Koalisiya qeyri-müəyyən olaraq qalır və bu, siyasət iflicinə səbəb ola bilər", - "Saxo Bank"ın baş investisiya strateqi Charu Chanana deyib. Bununla belə, Chanana, "İnvestorlar, seçki nəticəsində heç bir böyük mənfi sürprizin olmadığı üçün rahatladılar. Mərkəzçi hökumətin biznes və investisiya üçün daha dost olan siyasətləri davam etdirməsi və hətta davam etdirməsi ehtimalı var",- bildirib.

Maliyyə islahatları

Analitiklərin diqqəti mühafizəkar Xristian Demokratların kövrək iqtisadiyyatı gücləndirmək üçün nə qədər tez koalisiya hökuməti yarada biləcəyinə yönəlib.

"Pictet Wealth Management"in makroiqtisadi tədqiqat rəhbəri Frederik Ducrozet, "Bazarlar üçün ən dost koalisiyalar hələ də nəzəri cəhətdən mümkündür",- deyib.

Analitiklər, maliyyə islahatlarına qarşı çıxan AfD-nin gözləniləndən yüksək səs payı almadığını və bunun da bazarlar üçün müsbət bir inkişaf olduğunu bildirirlər.

Bazarları ən çox narahat edən məsələ Almaniyanın büdcə kəsirini ümumi daxili məhsulun 0,35 faizi ilə məhdudlaşdıran “borc əyləci” kimi tanınan qaydada islahat edib-etməyəcəyidir.

Avropanın ən böyük iqtisadiyyatı olan Almaniya iqtisadiyyatı 2023-cü ildə kiçilib və 2024-cü ildə də kiçiləcəyi gözlənilir.