Milli Depozit Mərkəzi (MDM) beynəlxalq depozitarlarla əməkdaşlıq qurmamasının səbəblərini açıqlayıb.

MDM-dən "Marja"-ya verilən məlumata görə, beynəlxalq depozitarlara üzvlük prosesində tələb olunan əməliyyat həcmləri və bu üzvlük əsasında saxlanılan qiymətli kağızların iqtisadi səmərəliliyi əsas amil kimi qiymətləndirilməlidir. Xüsusilə Avropa bazarında əsas depozitarlar hesab edilən "Euroclear" və "Clearstream" üzvlüyə qəbul imkanlarını araşdırarkən, yerli bazar iştirakçılarının marağı dərəcəsi və bu depozitarlarda saxlanılması planlaşdırılan qiymətli kağızların həcmi əsas götürülür.

Məlumata görə, bu kimi beynəlxalq depozitara üzvlüyə qəbul olunmaq üçün sözügedən qurumun risk idarəetmə siyasəti, cinayət yolu ilə əldə edilmiş əmlakın leqallaşdırılması və terrorçuluğun maliyyələşdirilməsinə qarşı mübarizə (ƏL/TMM) prosedurları beynəlxalq tələblərə tam uyğun olmalıdır.

MDM-dən bildirilib ki, daxili bazar iştirakçılarının Avropa bazarlarında emissiya edilən qiymətli kağızlara marağının nisbətən az olması, beynəlxalq depozitarlara üzvlük üçün zəruri həcmlərin formalaşmamasına və Milli Depozit Mərkəzinin (MDM) bu depozitarlar ilə infrastrukturun qurulmamasına zəmin yaradıb. Lakin son dövrlərdə daxili bazar iştirakçıları tərəfindən formalaşan tələb bu istiqamətdə əməliyyatların aktivləşdirilməsinə təkan verib.

Azərbaycanın mərkəzi depozitarından qeyd edilib ki, bu yöndə atılan addımlar çərçivəsində MDM, ötən il risk idarəetmə prosedurlarını beynəlxalq standartlara uyğunlaşdırmış, ƏL/TMM siyasətini və bu siyasətdən irəli gələn daxili qaydaları yenidən formalaşdırır.

Eyni zamanda qurumdan verilən məlumatda "MDM, "Euroclear" və "Clearstream" ilə danışıqlara başlamış və qeyd olunan tələblərin tam şəkildə yerinə yetirilməsindən sonra bu depozitarlarda hovuz hesabının açılması üçün rəsmi müraciət prosedurlarını işə salacaq. Qeyd edilməlidir ki, bu depozitarlara üzvlüyə qəbul və hesabın aktivləşdirilməsi proseduru uzunmüddətli prosesdir" - deyə əlavə edilib.

Qeyd edək ki, sözügedən əməkdaşlıq, Azərbaycan kapital bazarının beynəlxalq maliyyə sisteminə inteqrasiyasını sürətləndirəcək.