Türkiyənin Enerji və Təbii Sərvətlər Naziri Alparslan Bayraktar "X" sosial media hesabında etdiyi paylaşımda Türkiyə ilə Türkmənistan arasında enerji əməkdaşlığında tarixi bir addım atıldığını qeyd edib.

Marja.az xəbər verir ki, Türkiyə Enerji və Təbii Sərvətlər Nazirliyinin yaydığı açıqlamaya görə, sözügedən müqavilə ilə tədarüklərə martın 1-də başlanması planlaşdırılır.

Prezident Rəcəb Tayyib Ərdoğan 2024-cü il martın 1-də Antalya Diplomatiya Forumunda iştirak etmək üçün Türkiyəyə gələn Türkmənistan Xalq Şurasının sədri Qurbanqulu Berdiməhəmmədov ilə görüşüb. Görüşdə iki ölkə arasında təbii qaz və neft sahəsində əməkdaşlığın artırılmasına dair müqavilələr imzalanıb, Türkmənistanın zəngin təbii qaz ehtiyatlarının Türkiyə üzərindən Türkiyəyə və Qərbə daşınması niyyəti bəyan edilib.

Keçən iyul ayında enerji və təbii sərvətlər naziri Alparslan Bayraktar Türkmənistana gedərək danışıqlar aparmış, bu mövzuda dövlət başçıları səviyyəsində ciddi iradənin olduğunu vurğulayaraq, “İnşallah bunu reallaşdıracağıq və açığı, 1998-ci ildən bəri davam edən bu danışıqları yekunlaşdırıb, müəyyən mənada həyata keçirəcəyik” demişdi.

Türkmənistandan Türkiyəyə qaz axınının başlanması üçün lazımi texniki və hüquqi infrastrukturun yaradılması istiqamətində intensiv iş aparılıb. Nəticədə BOTAŞ və Türkmengaz şirkətləri arasında enerji sahəsində əməkdaşlıqda yeni dövrə başlayacaq mühüm razılaşma əldə olunub. Razılaşmaya əsasən, təbii qaz axınının martın 1-də başlanması planlaşdırılır.

Prezident Ərdoğan və Berdiməhəmmədovun iştirakı ilə ötən ilin mart ayında Antalyada imzalanan təbii qaz sahəsində əməkdaşlığın inkişafı üçün anlaşma memorandumunun konkret nəticəsinin bu gün əldə edildiyini bildirən Bayraktar, "Razılaşma çərçivəsində 1 mart 2025-ci il tarixindən etibarən qaz axınına başlanılması planlaşdırılır. İki ölkə arasında strateji əməkdaşlıq daha da inkişaf edəcək”,- deyib.