Ümumdünya Qızıl Şurasının 2024-cü il hesabatına görə, qlobal mərkəzi bankların qızıl ehtiyatlarının artması tendensiyası dayanmadan davam edir. Xüsusilə iqtisadi qeyri-müəyyənliklər və inflyasiyaya qarşı etibarlı "sığınacaq" axtarışları qızıla olan marağı daha da artırıb.

Bəs ən çox qızılı hansı ölkələrin mərkəzi bankları alıb?

Marja CNN Türk-ə istinadən xəbər verir ki, 2024-cü ildə ən çox qızıl almış ölkələr açıqlanıb. Azərbaycan reytinqdə 5-ci yerdədir. 

Ümumdünya Qızıl Şurası tərəfindən qeyd edilib ki, ölkəmizin qızıl alışlarına Azərbaycan Mərkəzi Bankının deyil, Azərbaycan Respublikası Dövlət Neft Fondunun (ARDNF) qızıl alışları daxildir. 

2024-cü ildə qızıl ehtiyatlarını ən çox artıran 10 ölkə və onların ümumi ehtiyatları aşağıdakılardır:

1. Polşa: 90 ton olmaqla 2024-cü ilin ən böyük qızıl alıcısı olub. Ümumi qızıl ehtiyatını 448 tona çatdırıb. 

2. Türkiyə: 75 ton qızıl alaraq ehtiyatını 528 tona çatdırıb.

3. Hindistan: 73 ton qızıl alıb, ümumi ehtiyatı 876 tona çatıb.

4. Çin: 44 ton qızıl alması ilə diqqət çəkib, ümumi ehtiyatı 2280 tona çatıb.

5. Azərbaycan 25 ton qızıl alıb və qızıl ehtiyatını gücləndirib (rəqəmə ilk 3 rübün rəqəmləri daxildir, 4-cü rüb alışı daxil deyil).

6. Çexiya: 20 ton qızıl alaraq ehtiyatını üç dəfə artırıb.

7. İraq: 20 ton qızıl alıb və ehtiyatını artırmağa davam edib.

8. Macarıstan: 16 ton qızıl alaraq qızıl ehtiyatını 110 tona çatdırıb.

9. Qana və Özbəkistan: hər biri 11 ton qızıl alıb. 

10. Qətər: Ehtiyatına 10 ton qızıl əlavə edib.

Ümumdünya Qızıl Şurasının EMEA üzrə baş analitiki Krişan Qopaul sosial media yazısında qeyd edib ki, Azərbaycan Respublikası Dövlət Neft Fondu (ARDNF) 2024-cü ilin son rübündə 20 ton qızıl alıb və bununla da 2024-cü il üçün qızıl alışını 45 tona çatdırıb.

“2024-cü ilin sonunda ümumi qızıl ehtiyatları 147 ton təşkil edib ki, bu da onun investisiya portfelinin 21%-ni təşkil edir (2023-cü ilin sonunda bu göstərici 12% idi),” Gopaul bildirib.

4- cü rüb alışı da nəzərə alınarsa Azərbaycan 2024-cü ildə cəmi 45 ton alışla 4-cü yeri tutur.