Azərbaycan Mərkəzi Bankının 2025-ci ildə pul siyasəti qərarlarının ictimaiyyətə açıqlanması qrafikinə görə, cari ilin ilk faiz qərarı 22 yanvar 2025-ci il tarixində açıqlanacaq.  

Marja.az xəbər verir ki, qərarın sabah Bakı vaxtı ilə saat 10:00-da elan ediləcəyi gözlənilir. Saat 11:00-da Mərkəzi Bankda mətbuat konfransı başlayacaq. 

"Azərbaycan Respublikası Mərkəzi Bankının İdarə Heyətinin faiz dəhlizinin parametrlərinə dair növbəti qərarı barədə press-reliz 22 yanvar 2025-ci il tarixində saat 10:00-da yayımlanacaqdır. Həmin gün saat 11:00-da Mərkəzi Bankda mətbuat konfransı keçiriləcəkdir", - Mərkəzi Bankın məlumatında bildirilir.

18 dekabr 2024-cü il tarixində, Azərbaycan Respublikası Mərkəzi Bankının İdarə Heyətinin qərarı ilə uçot dərəcəsi 7.25%, faiz dəhlizinin aşağı həddi 6.25%, faiz dəhlizinin yuxarı həddi isə 8.25% səviyyəsində dəyişməz saxlanılıb.

Mərkəzi Bank bildirib ki,  mövcud monetar siyasət inflyasiyanın hədəf diapazonu daxilində saxlanılmasına və inflyasiya gözləntilərinin sabitləşməsinə yönəlib. Mövcud siyasət çərçivəsində baza ssenari üzrə 2024-cü ilin sonuna və 2025-ci ildə illik inflyasiyanın hədəf daxilində (4±2%) olacağı proqnozu dəyişməz qalır. 

Faiz dəhlizinin parametrləri ilə bağlı növbəti qərarlar faktiki və proqnozlaşdırılan inflyasiya, xarici və daxili risk amillərinin dinamikasından asılı olacaqdır. Mərkəzi Bank davamlı olaraq iqtisadi prosesləri təhlil edir və maliyyə bazarlarını izləyir. Mərkəzi Bank əsas mandatından irəli gələrək qiymət sabitliyini təmin etmək üçün sərəncamındakı bütün vasitələrdən istifadə etməkdə qərarlıdır.

Qeyd edək ki, 2024-cü ilin dekabr ayında istehlak qiymətləri indeksi (inflyasiya göstəricisi) 2023-cü ilin dekabr ayına nisbətən 4,9 faiz, o cümlədən qida məhsulları, içkilər və tütün məmulatları üzrə 5,5 faiz, qeyri-qida məhsulları üzrə 2,4 faiz, əhaliyə göstərilmiş ödənişli xidmətlər üzrə 6,3 faiz təşkil edib. İnflyasiya Mərkəzi Bankın hədəf diapazonu daxilində (2 - 6 faiz aralığında) olduğundan sabah da faizlərin dəyişməz saxlanılacağı ehtimalı yüksəkdir.