Dövlət İmtahan Mərkəzi (DİM) 2023-cü ili 3 milyon 739 min manat xalis mənfəətlə başa vurub. Halbuki, DİM 2022-ci ildən 1 milyon 623 min manat xalis zərərlə çıxmışdı.

Qurumun maliyyə hesabatına görə ötən il DİM-in əməliyyat gəlirləri 38 milyon 983 min manat (əvvəlki ilə nisbətən 83,4 % çox), mal-material ehtiyyatları üzrə qiymətdəndüşmənin bərpası üzrə gəlirləri 121 min manat (3,2 dəfə az), investisiya gəlirləri 33 min manat (2,5 dəfə çox), digər gəlirləri 10 min manat (149,2 dəfə az), işçi heyəti üzrə xərcləri 21 milyon 777 min manat (34,8 % çox), amortizasiya xərcləri 2 milyon 907 min manat (6,4 % az), çap və redaktə xərcləri 5 milyon 949 min manat (4,1 dəfə çox), təmir və texniki qulluq xərcləri 514 min manat (6 % az), icarə xərcləri 292 min manat (29 % az), mühafizə xərcləri 255 min manat (3,4 % az), ehtiyyatların silinməsi xərcləri 284 min manat (əvvəlki il olmayıb), material xərcləri 778 min manat (33,2 %), ezamiyyə xərcləri 148 min manat (32,1 % az), digər xərcləri 1,695 milyon manat (54 % çox), mənfəət vergisi ödəmələri 676 min manat (40 dəfə çox), digər vergi ödəmələri isə 133 min manat (33,5 % az) təşkil edib.

Bu il yanvarın 1-nə DİM-in aktivləri 47 milyon 228 min manat olub ki, bu da illik müqayisədə 18,2 % çoxdur. Hesabat dövründə qurumun öhdəlikləri 51,2 % artaraq 1 milyon 971 min manata, balans kapitalı isə 17,1 % artaraq 45 milyon 257 min manata çatıb.

DİM ölkə Prezidentinin 11 aprel 2016-cı il tarixli fərmanı ilə yaradılıb. Onun nizamnamə kapitalı 1 milyon manatdır. Mərkəz dövlət qulluğu üçün kadrların seçilməsi, təşkilati-hüquqi və mülkiyyət formasından asılı olmayaraq ali və orta ixtisas təhsili müəssisələrinə tələbə qəbulunun həyata keçirilməsi məqsədi ilə, habelə müqavilə əsasında dövlət orqanları, hüquqi və fiziki şəxslər üçün imtahanlar təşkil edən publik hüquqi şəxsdir.

© “Report”